Ministri i Jashtëm i Rusisë, Sergey Lavrov deklaroi se do t’u kundërpërgjigjen sanksioneve që SHBA-ja ka vendosur të zbatojë ndaj kompanive ruse, transmeton Anadolu Agency (AA).
Lavrov mbajti një konferencë për media pas takimit në kryeqytetin rus Moskë me ministrin e Jashtëm të Katarit, Mohammed bin Abdulrahman bin Jassim Al Thani.
Në vlerësimin e tij lidhur me vendimin e SHBA-së për të zbatuar sanksione kundër disa kompanive dhe shtetasve rusë, Lavrov tha se “SHBA-ja që prej një kohe të gjatë po ndjek një politikë armiqësore kundër vendit tonë. Ndaj kësaj do të jepet kundërpërgjigje”.
Duke vënë në dukje se me sanksionet SHBA-ja ka shkelur normat ligjore ndërkombëtare, Lavrov tha se “Këto hapa tregojnë se SHBA-ja do të vazhdojë t‘u imponojë të tjerëve rregullat e saj”.
“Çështja e Palestinës nuk duhet të mbetet në plan të dytë”
Kryediplomati rus përmendi edhe çështjen e Palestinës ku ai tha se “Në rast se Izraeli normalizon marrëdhëniet e tij me disa vende arabe, çështja palestineze nuk duhet të mbetet në plan të dytë dhe ajo duhet të zgjidhet në përputhje me ligjin ndërkombëtar, rezolutat e Kombeve të Bashkuara dhe Nismën Arabe”.
Lavrov vuri theksin se duhet të sigurohet uniteti mes palestinezëve dhe se duhet të përfundojnë proceset e filluara nga Lëvizja Hamas dhe Organizata Çlirimtare e Palestinës (PLO).
Ai tërhoqi vëmendjen mbi rëndësinë e formimit të kushteve të nevojshme për sigurimin e procesit të vazhdueshëm politik në zgjidhjen e çështjes së Libisë. Lavrov vuri në dukje se prej një kohe të gjatë nuk është emëruar Përfaqësuesi Special i Kombeve të Bashkuara për Libinë dhe se janë të shqetësuar nga kjo.
“Shpresojmë se do të zhvillohen punime të detajuara lidhur me Kushtetutën e Sirisë”
Lavrov ka përmendur edhe çështjen e Sirisë ku ai ka rikujtuar se kanë përfunduar takimet e raundit të 4-t të Komitetit Kushtetues të Sirisë që u mbajtën më 4 dhjetor në Zyrën e OKB-së në Gjenevë të Zvicrës.
“Në takimet që do zhvillohen në pjesën e dytë të janarit shpresojmë se do të zhvillohen punime të detajuara lidhur me Kushtetutën e Sirisë”, tha Lavrov.
“Çështja e Palestinës duhet të zgjidhet në kuadër të rezolutave ndërkombëtare”
Ministri i Jashtëm i Katarit, Mohammed bin Abdulrahman bin Jassim Al Thani lidhur me situatën në Gjirin Persik deklaroi se “Siguria në rajon është një çështje parësore për Katarin”.
Ai bëri të ditur se janë të interesuar për të formuar dialog me të gjitha vendet e rajonit përfshirë edhe Iranin. Al Thani u shpreh se “Katari mirëpret çdo iniciativë për të siguruar stabilitet”.
Duke përmendur çështjen e Palestinës, Al Thani potencoi se kjo çështje duhet të zgjidhet në kuadër të rezolutave ndërkombëtare.
Al Thani tha se “Është e pamundur që çështja të zgjidhet, nëse rezolutat në fjalë nuk zbatohen nga Izraeli, nëse nuk zbatohet e drejta e Palestinës që të formojë shtetin e saj sipas kufijve të vitit 1967 me kryeqytet Kudsin Lindor dhe nëse nuk merret në konsideratë e drejta për rikthimin e të gjithë refugjatëve”.
