Partia kryesore serbe e Kosovës, Lista Serbe, ka paralajmëruar për protesta nëse Kosova nuk heq dorë nga tarifa e imponuar prej 10 për qind për importet nga Serbia.
Lista Serbe paralajmëroi të premten se do të dalë në rrugë nëse qeveria e Kosovës nuk tërheq vendimin e saj për të vendosur një tarifë doganore prej dhjetë për qind për produktet nga Serbia dhe Bosnja dhe Hercegovina.
“Nëse masat e paligjshme të Prishtinës nuk tërhiqen, Lista Serbe do t’i ftojë qytetarët për protesta paqësore”, u tha në një deklaratë të kësaj partie.
“Lista Serbe ka qenë e detyruar të vendosë për këtë rrugë të veprimit politik në mënyrë që të mbrojë interesat jetike të qytetarëve të përkatësisë etnike serbe, të cilët veçse pësojnë dëm të madh për shkak të veprimeve të paligjshme të Prishtinës”, shtoi ajo.
Qeveria e Prishtinës vendosi tarifat mbi Serbinë dhe Bosnje dhe Herzegovinën të martën e kësaj jave, duke zënë si shkas qëndrimin armiqësor të Beogradit ndaj Kosovës dhe duke akuzuar Bosnjë dhe Herzegovinën për vendosjen e barrierave ndaj importeve nga Kosova.
BE-ja përmes zëdhënësit të saj i ka bërë thirrje Prishtinës të heqë tarifat, duke thënë se ajo është “një shkelje e qartë e detyrimeve të Kosovës” sipas Marrëveshjes së Tregtisë së Lirë të Evropës Qendrore, CEFTA.
Lista Serbe tha se serbët në Kosovë nuk duan të jenë peng të “përfaqësuesve të papërgjegjshëm shqiptarë dhe të luftës së tyre demagogjike dhe panikës për mbijetesën e tyre politike” dhe u zotuan të mbështesin përpjekjet në parlamentin e Kosovës për të rrëzuar qeverinë.
Vlen të theksohet se kjo parti disa herë ka bojkotuar parlamentin e Kosovës dhe ka pezulluar përfshirjen e saj në qeveri për shkak të mosmarrëveshjeve me këtë të fundit, siç ishte edhe ngjarja e muajit mars, gjegjësisht arrestimi dhe dëbimi i vonshëm i Marko Gjuriqit, kreut të zyrës së qeverisë serbe për Kosovën.
Megjithatë, deputetët e kësaj partie gjithmonë janë kthyer në legjislaturë dhe nuk kanë lënë pozitat e tyre qeveritare, megjithëse kanë vazhduar të bojkotojnë mbledhjet e qeverisë / balkaninsight.com.
