Uashingtoni nuk beson se Rusia është e gatshme të zhvillojë negociata me mirëbesim për të arritur paqen në Ukrainë në përputhje me Kartën e OKB-së dhe ligjin ndërkombëtar, kështu që Shtetet e Bashkuara do të fokusohen në furnizimin me armë për ukrainasit dhe forcimin e pozitave të vendit, tha Sekretarja për shtyp e Shtëpisë së Bardhë Karine Jean-Pierre në një konferencë shtypi në Uashington të martën, raporton Ukrinform, përcjell Fol Drejt.
“Është e vështirë të merret seriozisht ideja se Rusia është e përgatitur për diplomaci të mirëbesimit kur sulmet po dyfishohen,” tha ajo.
Ajo shtoi se rusët vetëm sa po intensifikojnë agresionin e tyre, nuk do të ndalojnë aneksimin e territoreve të Ukrainës dhe nuk do të braktisin idenë e ruajtjes së gjendjes aktuale të zhvillimeve.
“Kjo nuk është aspak një bazë për diplomaci të vërtetë,” tha Jean-Pierre.
Ajo kujtoi se presidenti i ShBA Joe Biden, në takimin e tij me Presidentin Volodymyr Zelensky në Shtëpinë e Bardhë, theksoi se Amerika qëndron për një paqe të drejtë.
“Kur flasim për paqe të drejtë, kjo duhet të përfshijë parimet e OKB-së për sovranitetin dhe integritetin territorial,” tha Jean-Pierre.
Ajo vuri në dukje se puna e Shteteve të Bashkuara në këtë kontekst është të vazhdojë të mbështesë Ukrainën në fushën e betejës “në mënyrë që ata të jenë në pozicionin më të mirë për të negociuar në tryezë kur kjo të ndodhë”. /FolDrejt/
