Në dy prej komunave veriore të Kosovës, Mitrovicë e Veriut dhe Zveçan, janë hasur mbishkrime të grupit rus “WAGNER” në mure të objekteve dhe në tabela komunikacioni.
Siç njofton raporti 24 orësh, këto mbishkrime mendohet të jenë shkruar gjatë ditës së djeshme, transmeton Fol Drejt.
Për rastin në Mitrovicë të Veriut, është raportuar se në mure të objekteve nga persona deri më tani të panjohur, janë shkruar mbishkrime me ngjyrë të kuqe “WAGNER”.
Njësiti policor i hetimeve po merret me rastin, po ashtu është njoftuar edhe prokurori kujdestar. Rasti është duke u hetuar.
Edhe në Zveçan, autorët e këtij mbishkrimi mbeten të panjohur, teksa mbishkrimet janë shfaqur në tabelat e komunikacionit.
Edhe në këtë komunë, policia ka nisur hetimet, e për rastin është njoftuar edhe prokurori kujdestar./FolDrejt/
