Ai ka lindur dhe është rritur në Zvicër – shtuar këtu faktin që është i martuar edhe me një zvicere, me të cilën ka edhe një fëmijët. Megjithatë, drejtësia zvicerane nuk ka qenë e mëshirshme me 27 vjeçarin nga Maqedonia. Ai duhet të dëbohet pasi në 2011 kishte kërcënuar dhe detyruar dy gra për marrëdhënie seksuale, shkruan në numrin e sotshëm “Luzerner Zeitung”.
Kjo nuk është historia e parë e dëbimeve fatale për familjet shqiptare dhe të huaja në përgjithësi në Zvicër. Sikur të dinin se çfarë pasoja sjell vepra penale në Zvicër, me siguri as që do e mendonin të kryenin mëkatin.
Konkretisht, 27 vjeçari mëkatin e ka kryer në moshën 20 vjeçare dhe nën efektin e drogës dhe alkoolit. Ai ndodhej me një shoqe në një diskotekë dhe pas një ndeje me të, ftuan një prostitutë në veturë. Pasi u larguan me veturë, u ndaluan në një parking dhe kryen marrëdhënie seksuale të pambrojtura (pa perzervativë). Jo më vonë se një javë, kjo lojë e tmerrshme për drejtësinë zvicerane, është përsëritur me një prostitutë tjetër – sëbashku me një të përfshirë tjetër.
“Kjo vepër është përbuzëse ndaj njerëzve dhe grave,” mendoi Prokuroria tre vjet pas kësaj ngjarjeje, kurse në tetor 2016 u dënuar me 3.5 vjet heqje lirie për shkak të dhunës ndaj grave. Një muaj më vonë, nëntor 2016 ai u martua me një zvicerane, kurse një vit më pas solli në jetë një vajzë. Shtetasi nga Maqedonia në këtë kohë qëndronte në burg.
Për shkak të ndodhive të mësipërme, përkundër krijimit të familjes, Zyra për Emigracion në Zvicër vendosi ngjashëm si Gjykata Kantoniale që ai duhet të lëshojë Zvicrën. Kjo përkundër që i dënuari u mundua të sqarojë përpara drejtësisë helvete se tani është kthyer në tjetër njeri dhe se nuk pi as drogë si pasojë e terapive.
Por në Zvicër ligji është ligj dhe tejkalon normat e ‘mëshirës’. Dhunimi seksual në Zvicër dënohet rëndë deri në dëbim, mjafton që Gjykata ta ketë shpallur fajtor personin me një dënim mbi një vjet.
Halli i vajzës së vogël?
Arsyetimi i Gjykatës që vajza e vogël të rritet pa një baba, nuk ka zmbrapsur vendimin, duke thënë se “ajo ka nënën e cila nuk ka gjasa të largohet drejt Maqedonisë.”
“Ai dhe bashkëshortja e tij duhet ta planifikojnë që jeta e tyre bashkëshortore nuk mund të vijojë në Zvicër,” përcjell foldrejt.com.
Tashmë 27 vjeçari fatkeq që për shkak të drogës rrezikon mirëqenien e tij dhe të familjes, ka shpresën e fundit – Gjykata Federale. Ai ka ankimuar çështjen në instancën më të lartë dhe të fundit – për të marrë përgjigje përfundimtare.
Por edhe Gjykata Federale, në shumë pak raste ka dhënë përgjigje pozitive për të pandehurit që kanë kryer delikte të dhunës seksuale. Megjithatë, shpresa vdes e fundit./Foldrejt.com
