Greqia ka kërkuar dëmshpërblime nga Gjermania 280 miliardë euro të reparacioneve të Luftës së Dytë Botërore, shumë që përkon thuajse me borxhin kolosal grek, shkruan revista gjermane “Der Spiegel”. Lajmi në formë zyrtare erdhi pak ditë para vizitës së presidentit gjerman Frank ëalter Steinmajer në Athinë – javët e kaluara. Gjithashtu, sipas raportit Greqia do të çojë çështjen edhe në gjykatat gjermane, në Këshillin Evropian dhe në OKB, megjithëse, siç dihet, Berlini ka ripërsëritur shumë herë se çështja është e zgjidhur dhe se nuk ka asnjë borxh ndaj Greqisë.
Kjo është sa i takon Greqisë, por a e dini sa para kishte kërkuar Shqipëria komuniste e Ramiz Alisë dëmshpërblime nga Gjermania?
Në 2014 erdhi Max Straus, djali i kryeministrit të Bavarisë dhe shefit të partisë CSU, Franz Josef Straus. Në një intervistë për “Ora news”, ai tregon qartazi udhëtimet në Shqipëri që i kreu sëbashku me të atin gjatë 1984, 1986:
“Në bisedë që kishim me zv.kryeministrin e atëhershëm Manush Myftiu na prezantoi me kërkesën e 200 miliardëve markave për riparimin dhe kompensimin nga dëmtimet e Luftës se Dytë Botërore. Në atë kohë vlenin sa 150 miliardë dollarë. Ishte një shifër e madhe, e paimagjinueshme dhe im atë mendoj që në këtë pikë dha përgjigjen më agresive. “Jam shumë i sigurtë se Gjermania do të mbijetonjë edhe për 100 vitet e ardhshme pa Shqipërinë, por nuk e di nëse Shqipëria do të mbijetonjë në ato kushte pa Gjermaninë.”
Pas kësaj vizite, Straus i cili udhëhoqi edhe ministrinë e financave në Gjermani, ofroi një ndihmë me interes zero dhe pa kufizim kohor në shumën prej prej 100 milionë marka në vit. Qëllimi i Strauss ishte ta ndryshonte Shqipërinë dhe të tregonte se me ekonominë e lirë mund të fillonte ndryshimi. Kjo shifër ishte një miks mes huasë dhe ndihmës, pasi në shumicën e rasteve këto kredi zhvleftësoheshin. Poashtu ajo ishte në një kohë kur rroga e një inxhinieri në Shqipëri ishte 8 dollarë në muaj. Ky është efekti i vërtetë sepse nëse do të ishin ndërtuar këto vepra me çmimet komuniste në ato vite përfitimi do të kishte qenë shumë i madh. Me 3-4 vjet ndërton gjëra të mëdha që kushtojnë miliarda. Investimet e tjera vijnë më vonë, por asgjë nuk vjen pa ndërtuar rrugët. 200 miliardët si dëmshpërblim që ata kërkonin për dëmet e luftës, nuk i mori askush seriozisht në asnjë moment, kujton i biri Max Straus që vizitoi Shqipërinë gjatë fundit të komunzmit, shkruan foldrejt.com.
Mbase kjo ndihmë gjermane mund të bëhej realitet, sikur Franz Josef Straus të kishte jetuar deri në rrëzimin e sistemit komunist në 1992. Strauss ndërroi jetë në 1988. Nëse analizojmë ofertën gjermane, kjo me të vërtetë ia vlen të quhet “shansi i humbur gjerman për Shqipërinë”.
Këtë shans të humbur, e përmend edhe protagonisti i politikës shqiptare.
“Më në fund Straussi, i dha më duket 20 milionë marka falas qeverisë shqiptare dhe 20 milionë të tjera si kredi në fushën e mjekësisë, industrisë”, shprehet në intervistë ish-presidenti i ndjerë, Ramiz Alia.
Detaje tjera të vizitës së Strauss në Shqipëri
Në vitin 2004 magazina më e madhe gjermane “Der Spiegel”, rreth vizitës së parë të Franz Josef Strauss në Shqipëri jep një detaj, kur shkruan se funksionari gjerman kërkonte nga Shqipëria të mos khehej në bazë ushtarake sovjetike dhe se perëndimit nuk i interesonte se çfarë ngjyra politike kishte Shqipëria. Pas vdekjes së Enver Hoxhës, Strauss vizitoi përsëri Shqipërinë në 1986 dhe kësaj here vizita nuk ishte pa sukses.
“Ekonomia gjermane filloi hapjen e bizneseve të para, për blerjen e burimeve të tekstilit, firma Salzgitter AG shfaqi interes për kromin e Bulqizës, kurse edhe shoku i Strausit, udhëheqësi i Mercedesit në Mynih, Karl Dersch, shfrytëzoi kontaktin për të sjellur veturat e tij në Shqipëri,” shkruan “Der Spiegel”, përcjell foldrejt.com. Dhe vërtet Shqipëria pas një kohe shumë të shkurtër do kthehej në vendin e mercedes-benz-ave./Foldrejt.com
