Salmoni është një nga ato ushqime që nuk mund t’i ngatërrosh as për nga pamja dhe as për nga shija.
Gjithashtu dhe një nga më të pasurit me omega-3 që ndihmon trurin dhe të gjith organizmin.
Perfekt për ata që duan të mbajnë dietë ose për ata që kanë një regjim ushqimor strikt për shkak të gjendjes shëndetësore.
Ngrënia e salmonit do ju mbajë të ngopur për shumë kohë.
Salmoni është i pasur me acide yndyrore omega-3 të cilat ju ndihmojnë të përmirësoni metabolizmin dhe të mbani një peshë të mirë trupore.
Për më tepër, salmoni është shumë i mirë për të ulur kolesterolin dhe mirëmbajtur shëndetin e zemrës.
Për ta shijuar sa më të shëndetshëm në shtëpitë tuaja ndiqni mënyrën që AgroWeb.org ju tregon.
Përbërësit
2 fileto salmoni
1 tufë majdanoz
Gjysmë limoni
Kripë
Piper i zi
Vaj ulliri
Përgatitja
Për të nisur me përgatitjen e kësaj recete AgroWeb.org ju këshillon që gjithnjë peshkun ta zgjidhni sa më të freskët për shije më të mirë.
Marinoni fileton e salmonit duke e lyer me kripë dhe piper nga të gjitha anët.
Më pas hidhini sipër majdanoz të freskët dhe vendoseni në një tavë të shtruar me letër kuzhine.
Sipër dhe poshtë vendosini nga një fetë limon dhe shtoni po aty pak vaj ulliri.
Para se ta piqni mbështilleni me letër pjekje të mbyllur nga të gjitha anët në formën e një karameleje, duke krijuar hapësirë në mes.
Në këtë mënyrë salmoni juaj do të qëndrojë i butë edhe pas pjekjes.
Futeni të piqet në temperaturën 180 gradë për 25 minuta.
Kur të jetë gati hiqni me kujdes letrën e pjekjes dhe shërbejeni bashkë me lëngun e tij dhe erëzat./AgroWeb.org
