Gjysma e Europës është në protestë dhe sot këtyre shteteve u shtohet edhe Maqedonia. Duke ndjekur shembullin e kolegëve të tyre në Tiranë, studentët e Tetovës kanë plot arsye për të protestuar ndaj qeverisë që nuk ka mbajtur premtimet për një arsim më cilësor, shkruan foldrejt.com.
Motoja e studentëve shqiptarë të Maqedonisë është “#MeStudentët”, kurse protesta do të mbahet, në Sheshin “Iliria” në Tetovë, me fillim nga ora 12:30.
Studentët u drejtohen ministrit të Arsimit dhe Shkencës, Arbër Ademi, universiteteve shqiptare në Maqedoni dhe kryeministrit të Maqedonisë, Zoran Zaev.
13 kërkesat e studentëve janë siç vijojnë më poshtë:
- Subvencionimi ose largimi i pagesës së praktikës dymujore nga Universiteti i Tetovës në vlerë prej 50 euro.
- Zvogëlimi i tarifës për studentët e huaj për 50%.
- Largimi i pagesës prej 100€ për çregjistrim nga universiteti.
- Të financohet ekskursioni profesional ose largimi i saj si lëndë obligative.
- Ndalimi i kushtëzimit me blerje të librave për nënshkrim nga ana e profesorëve të caktuar.
- Furnizimi dhe renovimi i sallave, laboratorëve dhe mjeteve tjera të domosdoshme për studentët.
- Publikimi i statutit të Universitetit të Tetovës dhe raport-vlerësimi i evoluimit të studentëve që bëjnë për profesorët të jetë në faqen e universiteteve.
- Statuti i Parlamentit Studentor të jetë në faqen e universitetit. Parlamenti studentor të jetë i pavarur nga rektori dhe partia politike.
- Largimin e profesorëve të denoncuar për kryerje të ndonjë vepre penale brenda institucioneve arsimore.
- Rishikimi i titujve akademik dhe verifikimi i plagjiaturave. A është respektuar ligji, koha për kalim prej një titull në tjetër dhe punimet shkencore?
- Ndalimi i diskriminimit të femrave dhe kushtëzimi i tyre me akte të turpshme në këmbim note.
- Kërkojmë nga Revizioni Shtetëror, Komisioni për Antikorrupsion, Inspektorati i Arsimit dhe Policia Financiare që të hetojnë çdo shpenzim të buxhetit të universiteteve që plotësohet nga studentët dhe taksapaguesit.
- Kuadri universitar të marrë mbi vete ndryshimin e plan programeve mësimore, diskriminuese, në të gjitha nivelet e arsimit shqip.
- T’u ndërpritet ndikimi i emërimit të mësimdhënësve nga partitë politike.
- Kërkojmë urgjentisht të çlirohen universitetet nga nepotizmi i skajshëm. Në vend të familjarëve, të punësohen profesorë të kualifikuar që do punojnë për interesin e studentëve, e jo për qëllime personale-familjare./Foldrejt.com
