The Guardian ka raportuar së fundmi për situatën në Kosovë. Sipas prestigjiozes britanike, nëse vërtetohet se Aleksandër Vuçiq, president i Serbisë, qëndron prapa sulmit terrorist të 24 shtatorit në veri të Kosovës nga një grup serbësh të armatosur, atëherë shteti fqinj do të përballet me akuza të ashpra nga perëndimi, transmeton Fol Drejt.
Ky është artikulli i plotë:
Kosova ka akuzuar Serbinë se qëndron pas një grupi paraushtarak që ia zuri pritën një patrulle policie dhe u përlesh me forcat kosovare të dielën.
Autoritetet në Prishtinë shfaqën një sërë armatimesh moderne që ata thanë se grupi po përdorte, duke përfshirë dy makina të blinduara të prodhimit serb dhe një granatëhedhës, së bashku me një dokument që supozohej se tregonte se granatahedhësi, i bërë nga kompania e armëve Zastava, ishte furnizuar nga ushtria serbe.
Qeveria e Kosovës pohoi gjithashtu se lideri i grupit ishte një politikan i shquar serb i Kosovës besnik ndaj presidentit serb, Aleksandar Vuçiq, dhe se një nga tre luftëtarët paraushtarakë të vrarë të dielën ishte një ish-truproje e Aleksandar Vulin, shefit të inteligjencës serbe i sanksionuar nga ShBA-të në korrik, për korrupsion.
“Ky grup ka ardhur nga Serbia, ata janë të trajnuar në Serbi, të financuar nga ata dhe gjithashtu të pajisur nga ushtria e Serbisë dhe policia e saj”, tha për Guardian Xhelal Sveçla, ministri i Brendshëm i Kosovës.
“Një pjesë e armëve janë marrë nga magazinat e ushtrisë dhe janë dorëzuar te terroristët që kanë ardhur në Kosovë nga Serbia”.
Sveçla tha se ministria e tij kishte ndarë provat me ambasadat dhe agjencitë perëndimore.
“Ajo që ata donin të bënin është të kapnin territorin e Kosovës dhe të hapnin një kanal të ri komunikimi, një rrugë të re nga Serbia në Kosovë”, tha ai, duke shtuar se qëllimi përfundimtar ishte ndarja e vendit.
Qeveria serbe ka mohuar përfshirjen me grupin e armatosur, por ka mbajtur një ditë zyrtare zie për tre të vdekurit.
Vuçiq ka kërkuar të justifikojë veprimet e tyre duke pretenduar rrejshëm, në një takim me ambasadorin rus në Beograd, se qeveria e Kosovës po kryente spastrim etnik, shkruan Guardian.
Kosova pretendon se grupi drejtohej nga Milan Radoiçiq, nënkryetari i partisë Lista Serbe e mbështetur nga Beogradi, e cila dominon politikën në katër komunat me shumicë serbe në veri të Kosovës.
Sveçla tha se shërbimi i inteligjencës së vendit të tij besonte se Radoiçiq, i cili është sanksionuar nga SHBA dhe Britania e Madhe, ishte plagosur dhe po shërohej në spitalin kryesor ushtarak në Beograd.
Pretendimi nuk mund të verifikohej në mënyrë të pavarur. Radoiçiq nuk ka bërë një deklaratë publike, por ministri i Jashtëm i Serbisë, Ivica Daçiq, pretendoi se një video që pretendonte se tregonte Radoiçiqin në mesin e paraushtarakëve ishte një “mashtrim”.
Përplasja ndodhi në një kohë kur bisedimet e ndërmjetësuara nga BE-ja që synojnë normalizimin e marrëdhënieve midis dy vendeve kanë ngecur, me Vuçiqin që u zotua se nuk do ta njohë kurrë Kosovën dhe me Qeverinë e Kosovës e cila refuzon të krijojë një asociacion gjysmë autonom të komunave serbe.
SHBA-të i kanë mbështetur bisedimet dhe deri më tani kanë mbajtur anën e Evropës, e cila ia ngarkon fajin më të madh për dështimin e tyre te kryeministrit kosovar, Albin Kurti. Por administrata Biden po heton përfshirjen e Beogradit në njësinë paraushtarake dhe po përpiqet të zbulojë misionin e saj.
Nëse Vuçiç zbulohet se ka qenë i përfshirë, kjo mund të ndryshojë qasjen e ndërmarrë nga SHBA dhe BE ndaj negociatave, të cilat janë kritikuar nga ligjvënësit në të dy anët e Atlantikut si të njëanshëm ndaj Beogradit. Kjo gjithashtu mund të çojë në sanksione ndaj Serbisë.
“Është gjithnjë e më e qartë se ka pasur një skenar në punë për të provokuar një konflikt në mënyrë që ushtria serbe pastaj të hyjë për të mbrojtur popullin serb në veri dhe kështu të zbatojë ndarjen e Kosovës”, tha Sonja Biserko, nga Komiteti për të Drejtat e Njeriut në Serbi.
“Ky operacion, pavarësisht se kush është drejtpërdrejt përgjegjës për të në Beograd, ka kaluar një vijë të kuqe që perëndimi nuk mund ta tolerojë,” tha Biserko. “Kjo situatë nuk është provokuar nga Kurti, siç komentojnë shumica në Beograd. Përkundrazi, ai tregoi pjekuri dhe policia e Kosovës tregoi profesionalizëm”.
Në një dokument informues për BE-në, qeveria e Kosovës tha se “një grup prej dhjetëra personash të armatosur të maskuar, hapën zjarr ndaj një patrulle rutinë nga oficerët e policisë” më 24 shtator në fshatin Banjskë, afër kufirit serb.
Në përleshjet u vra një polic kosovar, si dhe tre anëtarë të grupit paraushtarak dhe disa të tjerë u plagosën. Grupi serb më pas u tërhoq me makina të blinduara në një manastir afër fshatit, duke u izoluar.
Përpara se policia kosovare të mund të merrte kontrollin e manastirit, tha Sveçla, disa nga grupi paraushtarak arritën të largoheshin dhe të kalonin në Serbi” – raporton the Guardian.
Sekretari amerikan i shtetit, Antony Blinken, dënoi sulmin ndaj policisë kosovare dhe tha: “Autorët e këtij krimi duhet të mbajnë përgjegjësi përmes një procesi hetimor transparent.”
“I bëjmë thirrje qeverive të Kosovës dhe Serbisë që të përmbahen nga çdo veprim apo retorikë që mund të nxisë më tej tensionet.”
Sipas The Guardian, Blinken kërkoi një “kthim në dialogun e lehtësuar nga BE”.
Edward P Joseph, një ish-zëvendës shef i misionit në Kosovë i Organizatës për Siguri dhe Bashkëpunim në Evropë, tha se nëse Beogradi qëndron pas grupit paraushtarak, SHBA-ja do të duhet ta rimendojë qasjen e saj ndaj rajonit.
“Çështja është se thirrjet për dialog janë boshe tani që e gjithë strategjia e SHBA-ve për ta kultivuar Serbinë e Vuçiqit si “partnere”, është hedhur në erë”, tha Joseph, tani një anëtar i lartë në shkollën e studimeve të avancuara ndërkombëtare të Universitetit Johns Hopkins në Uashington.
“Mohimet e njohurive të Vuçiqit janë po aq të besueshme sa politika iluzionare e SHBA-së ndaj Serbisë”.
Shpend Ahmeti, një politikan i pavarur kosovar dhe ish-kryetar i Prishtinës, tha: “Është e qartë se ditët dhe javët në vijim do të jenë të tensionuara. Këtu nuk ka mbaruar gjithçka.”
“Milicët e vdekur u trajtuan si heronj dhe kjo do të thotë se kjo është një thirrje për më shumë ‘heronj’, por është gjithashtu e sigurt që tani aftësitë e tyre janë pakësuar”./FolDrejt/
