Në Bibliotekën Kombëtare “Pjetër Bogdani” sot është folur për veprimtarinë gati gjysmë shekullore të Shaip Beqirit, poet, publicist, e eseist, shkruan Fol Drejt.
Qe Festivali “Aktori dhe Poeti” ai që ua hapi dyert veprave të Beqirit.
Drita Begolli, regjisore, në cilësinë e organizatores, i falënderoi të pranishmit, ndërsa e hapi takimin duke ia dhënë fjalën botuesit të Beqirit, shkrimtarit Nazmi Rrahmani.
Ndërsa foli për librin “Mozaiku i Mbuzur”, Rrahmani veçoi intervistat e realizuara me personalitete të ndryshme të jetës kulturore, duke i cilësuar ato “si një thesar të paçmueshëm”.
“Bisedat dhe intervistat e bëra me Kasem Trebeshinën, Dhimitër Shuteriqin, Fredrik Rreshpjen, Kadarenë, Rugovën, Demaçin, shkojnë edhe më thellë veprimtarisë së tyre letrare, por edhe politike” – tha ndër të tjera Rrahmani.
Profesori Ibrahim Berisha, ndërkaq, kujtoi kontributin e dhënë të Beqirit, edhe në një tjetër dimension: në përkrahjen e brezave të shkrimtarëve, poetëve, kritikëve e gazetarëve të rinj, duke ua hapur dyert, në një kohë, kur nuk kishte shumë shtigje dhe aq mundësi sa ka sot.
Duke e portretuar si një mik të të disa prej figurave më të shquara të fundshekullit të kaluar, rrjedhimisht edhe njohës shumë të mirë veprimtarisë së tyre, Berisha tha se materia që e ofron “Mozaiku i mbuzur”, është, andaj, shumë e vlefshme.
Profesori Berisha veçoi sidomos disa intervista dhe biseda të zhvilluara me disa prej figurave, duke ofruar shembuj konkret, se si nga to ndriçohet raporti që kishin ndërmjet vete. Ai në këtë pikë mori si shembull Ibrahim Rugovën dhe Adem Demaçin.
Për një aspekt tjetër të veprimtarisë së Beqirit foli shkrimtari dhe publicisti Imer Topanica. Ai u ndal te poezia e Beqirit, duke i paralajmëruar të pranishmit për vështirësitë që një lexues dhe kritik mund t’i hasë, ndërsa rreket ta përthekojë “përmasën e poezisë së tij”.
“Poezia e Beqirit nuk është një sipërfaqe e një pasqyreje të lëmuar. Ajo të vjen si e plasur e copëtuar mbi një taban të fortë, ndërsa reflekton imazhin njerëzores të përthyer në qindra pjesë. Si e tillë, ajo mishërohet me dhimbjen duke e latuar këtë të fundit në një “muranë poetike”; ajo mbjell mllefin për ta rikrijuar në një “hidër mitologjike”, që vetëm duhma e saj i vret armiqtë; është e larmishme, krejt pranë një “mozaiku të mbuzur” me tone gjithfarë llojesh, e kështu me radhë, e kështu me radhë” – u shpreh ndër të tjera Topanica.
Më e detajuar në interpretimn e saj u shfaq studiuesja e re Leonora Hajra (e cila nuk ishte e pranishme aty, por fjala e saj u lexua). Duke iu referuar historisë së lashtë të Lakontit grek, tërhoqi një paralele me poetin Beqiri, duke i puqur të dy figurat në misionin e tyre fisnik.
“Në letërsinë greke, Laokoonti njihet si prifti që paralajmëron trojanët për rrezikun që u kanoset nga pranimi i dhuratës së akejve, kalit të drunjtë dhe është po ky që përbuzet e ndëshkohet pse e vërteta e tij, besimi i tij ndryshon nga të tjerët. Beqiri është laokoont në lirizmin e tij, është poeti i dënuar me heshtjen që përmes kësaj përmbledhjeje dëshiron ta zhveshë fatin e tij tragjiko-poetik para brezit të ri.”
Kësisoj veprimtaria e këtij poeti, kritiku e publicisti, u bë shkaktare edhe për një bisedë për letërsinë, kulturën, si dhe heronjtë e këtyre sferave, kontributi i të cilëve është një gurthemel i republikës sonë.
Ua kujtojmë që ky është edicioni i parë i Festivalit “Aktori dhe Poeti”./FolDrejt/
