Muslimanët e rinj nga vendet arabe dhe afrikanoveriore janë më së shumti të ekspozuar për të mbështetur shtetin sheriatik në Zvicër. Kjo është bërë me dije nga një anketë e shkollës së lartë të Cyrihut ZHAW, shkruan foldrejt.com.
21 nga 776 të anketuarit muslimanë dhe adoleshentë janë paraqitur si islamikë. Përveç që mbështesin sheriatin, këta të rinj nënvlerësojnë shoqëritë perëndimore dhe kanë armiqësi ndaj Zvicrës.
Prej 776 të anketuarve 268 ishin nga Kosova, 144 nga Turqia, 99 nga Maqedonia, 122 nga vendet arabe dhe afrikanoveriore, 139 nga vendet tjera. Shumica e tyre ishin suni, kurse 149 si shia, 62 si alevitë.
Siç mund të shihni në tabelë për sheriatin më së shumti janë pro nga vendet arabe dhe afrikanoveriore (18.3 përqind), ndjekur nga vendet tjera (14.7 përqind), shtetasit e Maqedonisë (13.6 përqind), kosovarët (11.8 përqind) dhe në fund turqit me përqindjen më të vogël 8.8 përqind.
Kjo është përqindje e vogël, kur bëhet fjalë për nënvlerësim të shoqërisë perëndimore, ku vendet arabe dhe afrikanoveriore kanë përqindjen më të lartë 54.7 përqind, kurse nivel të lartë kanë edhe shtetasit e Maqedonisë 44.9 përqind.
Sipas studiuesit të ZHAW, Dirk Baier, kjo mund të ketë ardhur se të rinjtë muslimanë e bëjnë përgjegjës perëndimin për “dhunën dhe luftën në shtetet muslimane.”
Kur jemi te shtetasit e Maqedonisë, të rinjtë e tyre kanë përqindjen më të lartë në pyetjen a kanë armiqësi kundrejt muslimanëve jo-tradicionalë (43 përqind). Të rinjtë me origjinë kosovare dhe turke në Zvicër janë më pak të ekspozuar ndaj praktikave fetare islame.
