Slavjanka Petrovska dhe Sekretari amerikan i mbrojtjes Loid Austin nënshkruan një plan bashkëpunimi në fushën e mbrotjes, shkruajnë mediat në Maqedoninë e Veriut, transmeton Fol Drejt.
Ministrja e Mbrojtjes e Republikës së Maqedonisë së Veriut, Petrovska, me këtë rast tha se bashkë me ShBA-të do të qëndrojnë krah për krah, përballë sfidave që na presin:
“Sot, Maqedonia e Veriut është shtet anëtar i NATO-s dhe ne, së bashku me Shtetet e Bashkuara të Amerikës, qëndrojmë krah për krah në përballjen me sfidat e përbashkëta të sigurisë. Vitin e kaluar, Shtetet e Bashkuara na dhanë një mbështetje të madhe që nuk ishte vetëm financiare. Kemi shkëmbyer njohuri dhe përvojë, kemi praktikuar dhe trajnuar së bashku dhe jemi krenarë që kontribuojmë në sigurinë e NATO-s dhe të rajonit”, tha ajo.
Sipas njoftimit zyrtar, udhërrëfyesi i ri që u nënshkrua, përcakton fushat në bashkëpunimin në mes RMV-së dhe SHBA-së në fushën e mbrojtjes që do të jenë prioritete në dekadën e ardhshme dhe përmes të cilave do të zhvillohet mbrojtja dhe ushtria.
Në anën tjetër, Sekretari amerikan i Mbrojtjes, Austin, tha se Maqedonia e Veriut është shtet mik i ShBA-ve, me të cilin ndajnë shumë interesa të përbashkëta.
Të dy zyrtarët e të dyja shteteve shfrytëzuan rastin që ta dënonin agresionin rus në Ukrainë./FolDrejt/
