Viktimat e përmbytjeve në zonat e thella thonë se megjithëse u duhet të luftojnë ujërat në rritje pothuajse çdo vit, këtë vit humbjet kanë qenë veçanërisht të mëdha
Në atë që është quajtur një nga përmbytjet më të rënda në historinë e kohëve të fundit, 120 njerëz janë raportuar të vdekur në Bangladesh, si dhe 15 milionë të zhvendosur, shkruan AA, transmeton Fol Drejt.
Viktimat e përmbytjeve në zonat e thella thonë se megjithëse u duhet të luftojnë ujërat në rritje pothuajse çdo vit, këtë vit humbjet kanë qenë veçanërisht të mëdha.
Peara Begum, 65-vjeçe, nënë e pesë fëmijëve, ka jetuar në një autostradë që të çon në qytetin kufitar Companiganj nga rrethi verilindor Sylhet, pasi shtëpia e saj u shkatërrua nga përmbytjet.
Ujërat e përmbytjeve kapluan shtëpinë e saj prej kallaji dhe bambuje. Begum thotë se anëtarëve të familjes së saj iu desh të qëndronin për dy ditë në ujërat e thella deri në bel para se përfundimisht të shpëtoheshin.
“Me ndihmën e disa fqinjëve, ne arritëm në autostradë disi me varkë dhe që atëherë kemi jetuar këtu nën qiellin e hapur me një veshje të vetme”, thekson Begum, duke treguar drejt një pjesë të madhe të ujit, ku fshati i saj dikur qëndronte.
Por me një sipërfaqe të ujit që mbulon gjithçka, nuk ka asnjë gjurmë fshatrash përreth.
Teksa AA vizitoi rajonin Sylhet të goditur nga përmbytjet në kufi me Indinë, shihen shenja rrëfyese të shkatërrimit të lënë pas nga përmbytjet. Fshatarët u panë duke ecur, duke notuar dhe duke përdorur gomone të improvizuara ose skafe të vogla, duke shpëtuar të izoluarit ose duke shpërndarë ndihma. Një pjesë e madhe e habitateve dhe fermave po ashtu ndodhen nën ujë.
Duhej pothuajse një orë me varkë për të arritur në vendin e përmbytur nga uji nga ku Begum dhe të tjerët u detyruan të zhvendosen për shkak të përmbytjeve vdekjeprurëse.
Nevojitet zgjidhje e përhershme
“Vetëm pak dru dhe teneqe kanë mbetur. Unë po përpiqem ta restauroj vetëm për t’u strehuar me tre fëmijët e mi”, shpjegon Mohammad Rafiq.
Rafiq thotë se u duhet të paktën 10-15 vite për të rikuperuar dëmet e shkaktuara nga përmbytjet.
Në lokalitetin e largët Gussagram, Mohammad Juel kërkoi nga qeveria të gjejë një zgjidhje të përhershme për përmbytjet që po i godasin çdo vit.
“ Nëse qeveria na bën shtëpi prej betoni në shtylla të larta, atëherë ne mund të kemi lehtësim nga përmbytjet e tilla përgjithmonë”, thotë Juel.
Ai shton se shumë banorë të zonës kanë migruar në zona të ndryshme urbane për shkak të përmbytjeve. Disa prej tyre po luten tani pasi nuk kanë gjetur asnjë mjet tjetër jetese. Përmbytjet i kthejnë njerëzit në të varfër brenda natës.
Shirat e dendur goditën rajonin para musoneve që priten, një kujtesë e ashpër se ndryshimet klimatike po sjellin mot më ekstrem në mbarë botën.
58 lumenjtë e Bangladeshit, të cilët krijojnë fusha pjellore, po ashtu kanë qenë një fatkeqësi për vendin, pasi ato vërshojnë shpesh duke shkaktuar vdekje dhe shkatërrim në rajon.
Shefi i rrethi Sylhet, Mojibur Rahman, tha për AA se qeveria është në rrugën e saj për të gjetur një zgjidhje të përhershme për përmbytjet në rrethet më të rrezikuara të Sylhet-it dhe në rrethet fqinje të saj.
“Tash e tutje do të bëjmë më shumë kanale në vend që të ndërtojmë rrugë që gjatë sezonit të shirave të mos ndërpritet rrjedha e ujit. Nga ana tjetër, do të pastrojmë edhe dy lumenjtë kryesorë Surma dhe Kushiara”, theksoi Rahman.
Ai po ashtu tha se qeveria ka ndarë fonde për rindërtimin e shtëpive të dëmtuara të njerëzve të prekur nga përmbytjet këtë vit./FolDrejt/
