Krenare Sogojeva – Dermaku, komisionerja e Agjencisë për Informim dhe Privatësi, ka thënë se kanë vendosur gjobë prej 13 mijë euro ndaj Ministrisë së Punëve të Jashtme (MPJ), pasi e njëjta s’ka qenë transparente sa i përket njoftimit për shpenzimin e parasë publike, transmeton Fol Drejt.
E ftuar në emisionin “Sytë 7” në Klan Kosova ajo tregoi se për t’u afirmuar kjo e drejtë kushtetuese, Agjencia për Informim dhe Privatësi, nga data 26 shtator deri më 30 shtator do e shënojë Javën e Informimit, me moton “Tash edhe më lehtë”.
Sipas saj, këtë të hënë do kenë konferencë me Kryetarët e Komunave, të martën me Gjyqtarët dhe Prokurorët, të mërkurën me gazetarë dhe shoqëri civile, ndërsa të enjten me Sekretar të Ministrive dhe të premten me Kryetarët e Bordeve dhe Kryeshefat e Ndërmarrjeve Publike.
Sogojeva-Dermaku, tregoi se si agjenci janë të angazhuar që të rrisin transparencën e Institucioneve në Kosovë. E njëjta, madje bëri me dije se parashtrojnë edhe gjoba, kur institucionet nuk janë transparentë sa i përket kërkesave të qytetarëve, gazetarëve apo palëve të tjera./FolDrejt/
