140 të reja e të rinj që merren me aktivitete edukuese e kulturore me organizatën joqeveritare “Mural Fest Kosova”, janë lënë jashtë mbështetjes financiare nga Ministria e Kulturës, Rinisë dhe Sportit (MKRS). Nga të thënat e organizatës, faktor kyç rezultojnë të jenë disa gabime tekniko-administrative e disa vonesa brenda Ministrisë së Kulturës.
Nga Gëzim Olluri – Fol Drejt
Më 30 qershor të këtij viti, Ministria e Kulturës publikoi listën e OJQ-ve që u shpallën përfituese të “Thirrjes për projekt-propozimet Kulturore 2023” në Art dhe Trashëgimi Kulturore. Shuma totale e fondit financiar ishte 2 milionë e 765 mijë e 400 euro, e nga të cilat përfituan 116 OJQ. Mirëpo, jashtë listës mbështetëse mbeti organizata joqeveritare “Mural Fest Kosova”.
Nga reagimi i “Mural Fest Kosova” lë të kuptohet se arsyeja pse nuk janë mbështetur financiarisht, janë disa gabime tekniko-administrative e disa vonesa. Tutje, sipas reagimit, “Mural Fest Kosova” përgjegjëse është platforma e Ministrisë së Kulturës shkaku i së cilës dokumentacioni aplikues ka shkuar me vonesë tek Komisioni Vlerësues.
“Pas shpalljes së rezultateteve të përzgjedhjes, sipas Thirrjes publike për mbështetje të OJQ-ve në fushën e Artit dhe Trashëgimisë Kulturore, Kategoria e Parë: Mbështetje për zhvillim organizativ dhe programor të OJQ-ve të Artit dhe Trashëgimisë Kulturore nga Ministria e Kulturës, Rinisë dhe Sportit, rezulton se Mural Fest Kosova refuzohet dhe nuk do të mbështetet financiarisht sipas vendimit të komisionit të caktuar për vlerësimin e projekteve“, thuhet në reagimin Mural Fest Kosova.
Lidhur me refuzimin, janë dhënë edhe arsyet nga Mural Fest Kosova se për çfarë hollësish nuk janë mbështetur financiarisht nga ana e Ministrisë së Kulturës.
“Lidhur me këtë vendim nga shpallja e rezultateve preliminare të publikuara më datën: 19.06.2023, arsyetimi është që nuk e kalon vlerësimin administrativ – nuk e ka bashkangjitur formularin e aplikimit si dhe buxhetit, gjë që nuk qëndron meqenëse si pasojë e problemeve teknike në platformën e MKRS-së, dokumentet nuk kanë arritur në duart e komisionit vlerësues. Për këtë arsye është bërë ankesa drejtuar organeve të ministrisë, ku janë dorëzuar edhe dokumentet të cilat thuhet që kanë munguar“.
“Fol Drejt” ka kontaktuar organizatën për t’i konfirmuar reagimet e tyre. Ndër të tjera kanë shtuar që organizata vetëm një herë është ndihmuar nga MKRS vitin e kaluar, edhe këtë herë pas ankesës, presionit medial e publik.
“Departamenti i Kulturës në kuadër të MKRS-së asnjëherë nuk e ka përkrah “Mural Fest Kosova” përveç vitin e kaluar, edhe atë pas ankesës që e kemi adresuar dhe reagimit publik qe e patëm bërë në rrjetet sociale, por edhe në media. “Mural Fest Kosova” si organizatë vepron qe 8 vite, kryesisht me donatorë të huaj dhe ambasada“.
“Mural Fest Kosova” është OJQ që vepron nga viti 2016 me seli në Ferizaj. Merret me promovimin e artit, kulturës dhe edukimit përmes pikturimit. Fokusi i saj ka qenë tek pikturimi i muraleve në qytetin e Ferizajit, duke e shndërruar qytetin figurativisht në Qytet të Muraleve. Që nga themelimi, organizata ka punuar më shumë se 100 murale në Ferizaj dhe 50 murale në qytetet e tjera të Kosovës. Mos mbështetja nga Ministria e Kulturës, do t’i kufizojë aktivitetet e kësaj organizate.
“Mural Fest Kosova ka përmbyllur festivalin me sukses të lartë ku ka pasur artistë të ftuar të nivelit më të lartë e të dëshmuar ndërkombëtarisht. Ne kemi llogaritur në ato mjete financiare, por që me shumë keqardhje sot morëm vesh që pas shpalljes së rezultateteve finale, organizata jonë nuk është përkrahur nga MKRS. Përveç festivalit këto mjete do të shfrytëzoheshin edhe për shndërrimin e disa hapësirave publike përmes artit, gjë që do i kontribuonte edhe promovimit të artit dhe ngritjen e kapaciteteve të të rinjve në fushën e artit dhe kulturës“.
Ndër të tjera, reagimi i MFK-së njofton që të rinjtë e kësaj organizate asnjëherë nuk janë mbështetur nga institucionet publike të vendit. Aktualisht, janë 140 të rinj e të reja që aktivisht veprojnë në organizatën “Mural Fest Kosova”.
“Mos përkrahja ndaj Mural Fest Kosova si organizatë, është mos përkrahje ndaj mbi 140 të rinjve që janë të angazhuar në aktivitetet tona të edukimit, me qëllim të zhvillimit profesional. Këta të rinj nuk kishin marrë kurrë një mbështetje të tillë nga institucionet publike në vend. Aftësitë e kultivuara brenda Mural Fest Kosova tani po manifestohen përmes pjesëmarrjes së artistëve të rinj tanë në festivale dhe projekte të mëdha, të organizuara në nivele kombëtare dhe ndërkombëtare. Këto aktivitete realizojnë qëllimet e programit tonë si organizatë jofitimprurëse, për të cilët këto mjete financiare do të ishin një ndihmesë shumë e madhe“.
Sipas organizatës thuhet që i kanë plotësuar kriteret e kërkuara dhe vendimin e ministrisë e cilësojnë si të padrejtë. Për këtë arsye kanë adresuar ankesë në Ministrinë e Kulturës.
“Sipas kërkesave dhe kritereve që dalin nga kjo thirrje, Mural Fest Kosova i ka plotësuar ato, prandaj jemi shumë të zhgënjyer me njoftimin që për vitin 2023, organizata jonë nuk po përkrahet financiarisht nga MKRS. Konsiderojmë që ky vendim është i padrejtë, për të cilin do të dorëzohet edhe ankesë drejtuar instutitucionit përkatës“.
“Fol Drejt” ka dërguar kërkesë edhe në MKRS për të kuptuar më shumë rreth vonesave që janë bërë, refuzimit dhe nëse ankesa e organizatës do të merret parasysh, mirëpo nuk kanë kthyer përgjigje.
