Sipas Eurostatit, Bashkimi Evropian (BE) ka shpenzuar 15.2 miliardë euro gjatë vitit të kaluar, për të importuar produkte të ndryshme të energjisë së ripërtritshme, si turbina të erës, panele diellore dhe biokarburante, shkruan Fol Drejt.
Më saktë, BE-ja vitin e kaluar bleu 11.2 miliardë euro panele diellore, 3.4 miliardë euro biokarburant të lëngshëm dhe 600 milionë euro turbina me erë nga jashtë. Po ashtu eksportoi 6.5 miliardë euro produkte të energjisë së ripërtrishme gjatë kësaj periudhe. E gjitha po bëhet për t’u çliruar nga varësia e huaj në rrafshin energjetik.
Shumica e vendeve të BE-së kanë për objektiv rritjen e energjisë së rinovueshme për vitin 2030 në nivel 40%.
Që nga shpërthimi i luftës Rusi – Ukrainë, vendet Evropiane po e shohin si rrezik qenësor varësinë energjetike nga gazi apo burime të tjera të jashtme. Gazi natyror rus mbulon rreth 40% të tregut evropian.
Kosova ka bërë disa hapa në përmirësimin e prodhimit të energjisë, por është larg përmbushjes së ambicieve. Sipas ElecticytyMap prodhimi vendor nga thëngjilli shkakton një ndotje të lartë të ambientit me rreth 700-750g CO2 eq/kWh, që është më i ndoturi i Evropës.
“Republika e Kosovës është zotuar se do të punojë së bashku me BE-në në zbatimin e një politike të rreptë klimatike dhe në reformimin e sektorëve të energjisë dhe transportit, ashtu që të arrihet neutralitet i vazhdueshëm i karbonit deri në vitin 2050” – thuhet në një koncept dokument të hartuar para disa vitesh nga Qeveria e Kosovës.
Në qershor të këtij viti, Ministrja e Energjisë Artane Rizvanolli tha se vendi ynë synon të sjellë 1400 megavat kapacitete energjetike të bazuara në burime të ripërtëritshme të energjisë, deri më 2031. Po ashtu, “deri në vitin 2031, 35% e energjisë elektrike do të gjenerohet nga burimet e ripërtëritshme.”
Këto projekte ajo i ka cilësuar si ambicioze, por që, sipas saj, ka gatishmëri për t’i arritur ato. Era, dielli dhe uji, të cilësuara si burime të ripërtërishme, si resurse, nuk shfrytëzohen mjaftueshëm. Në Kosovë, një projekt i madh, premtues, është filluar në vargmalet që i ndajnë dy qytetet veriore të Kosovës: Mitrovicës dhe Podujevës. 27 turbina, që kanë kapacitet për prodhimin e 105 megavatëve për orë, veç janë vendosur në këtë pjesë të vendit. Kompania Sowi-Kosova, është përgjegjëse për krijimin e këtij parku. Kompania ka bashkuar firma nga Kosova, Izraeli dhe Gjermania, ndërsa synohet mbulimi i 10% të kapaciteteve prodhuese të energjisë./FolDrejt/
