Një gjykatë në Indi ka dënuar 38 persona me vdekje dhe ka urdhëruar burgim të përjetshëm për 11 të tjerë për një seri shpërthimesh në vitin 2008, ku si pasojë u vranë dhjetëra qytetarë në qytetin perëndimor, në Ahmedabad.
Gjykata kishte dënuar më 8 shkurt 49 persona për sulmet e koordinuara që vranë 56 dhe plagosën 200 persona, më saktë për shpërthime bombash nëpër tregje, autobusë dhe vende të tjera publike në qendrën tregtare të shtetit Gujarat.
Rreth 80 persona u akuzuan në përgjithësi për sulmet, por 28 u shpallën të pafajshëm. Të dënuarit u shpallën të gjithë fajtorë për vrasje dhe komplot kriminal.
Një avokat mbrojtës tha se ata do ta apelojnë vendimin në një gjykatë më të lartë.
“Ne kishim kërkuar dënime të buta për të dënuarit pasi ata kanë kaluar tashmë më shumë se 13 vjet në burg,” tha Khalid Shaikh për agjencinë e lajmeve Reuters. “Por gjykata caktoi vdekjen për shumicën e tyre. Ne patjetër do të shkojmë për apel.”
Një grup që e quan veten “Muxhahedinët Indianë” kishte marrë përgjegjësinë për shpërthimet e 26 korrikut 2008. Ai tha se akti ishte hakmarrje për trazirat fetare të vitit 2002 në shtet që lanë të vdekur rreth 1000 njerëz – kryesisht muslimanë, shkruan Al Jazera, transmeton Fol Drejt.
Gjyqi maratonë zgjati gati një dekadë, me më shumë se 1,100 dëshmitarë të thirrur për të dëshmuar. Ajo u zvarrit nga vonesat procedurale, duke përfshirë një betejë ligjore nga katër prej të akuzuarve për të tërhequr rrëfimet./FolDrejt/
