Zvicra tha se 46.1 miliardë franga (46.4 miliardë euro) në asete të qytetarëve dhe personave juridikë rusë janë depozituar në bankat e saj që nga vendosja e sanksioneve ndaj Moskës në fillim të këtij viti.
Zvicra, e cila nuk është anëtare e Bashkimit Evropian, por ka marrëdhënie të ngushta me të, vendosi sanksione të BE-së ndaj Rusisë pasi Moska filloi pushtimin e saj në Ukrainë në shkurt.
Ndër të tjera, sanksionet ndalojnë marrjen e depozitave prej më shumë se 100,000 frangash nga qytetarët dhe personat juridikë, kompanitë ose organizatat ruse.
Depozitat ekzistuese mbi atë shumë duhej të raportoheshin në Sekretariatin Shtetëror të Zvicrës për Çështjet Ekonomike deri në fillim të qershorit.
Sekretariati bëri të ditur se 123 qytetarë dhe subjekte publike kishin 7548 “marrëdhënie biznesi” me bankat në Zvicër me një vlerë totale prej 46.1 miliardë frangash (46.7 miliardë euro).
294 “marrëdhënie biznesi” të tjera në vlerën 400 milionë franga (405.6 milionë euro) janë bërë me Bjellorusinë, një aleate e ngushtë e Rusisë.
Shtetasit e Zvicrës, ose të vendeve në Zonën Ekonomike Evropiane, ose ata që kanë një leje qëndrimi të përkohshme ose të përhershme të njërit prej këtyre vendeve, nuk preken nga sanksionet dhe ndalimi i transferimit të parave te një palë tjetër për ruajtje, për sa kohë që depozitat nën 100.000 franga nuk raportohen.
Sekretariati theksoi se “niveli i depozitave të raportuara nuk mund të barazohet me shumën totale të fondeve me origjinë ruse të mbajtura në Zvicër”.
Rreth 7.5 miliardë franga asete financiare u ngrinë në Zvicër për shkak të sanksioneve që nga 25 nëntori. Këto janë fonde në pronësi ose të kontrolluara drejtpërdrejt nga persona, kompani dhe organizata që janë nën sanksionet e BE-së, transmeton Fol Drejt.
