Ndonëse greva në arsim po vazhdon dhe SBAShK-u nuk ka pranuar që ta pezullojë ose ndërprejë atë ishin 89 mësimdhënës që megjithatë e filluan procesin mësimor.
“Në SBAShK ka që mendojnë ndryshe, por përçarje nuk ka. Është një numër prej 89 mësimdhënësish që pjesërisht kanë filluar punën”, ka thënë kryetari i Këshillit Grevist, Reshit Kushaj.
Ata janë të gatshëm që të kenë edhe një takim me kryeministrin Albin Kurti për të arritur një marrëveshje.
“Takimi varet prej vullnetit të kryeministrit Albin Kurti. Në çdo kohë kur ai do të na bëjë thirrje, ne jemi të gatshëm të takohemi”.
Këshilli grevist i SBAShK-ut më herët ka njoftuar se e ka kërkuar mendimin e anëtarësisë greviste – që nga çerdhet e deri në universitete – lidhur me idenë për nisjen e mësimit nga data 3 tetor dhe pezullimin e grevës deri në janar të vitit 2023.
SBAShK-u, përmes një komunikate për media, tha se do t’i vazhdojë orvatjet që mësimdhënësve t’u rikthehet dinjiteti përmes dialogut social me qeverinë që e quan inatçore.
“Në ditët e sotme mësimdhënësit janë nëpërkëmbur, dinjiteti u është cenuar, e ata historikisht janë të njohur për sakrificën e tyre përgjatë viteve. Këtë nëpërkëmbje mësimdhënësit e kanë përjetuar viteve të 90-ta, gjersa lëkura e tyre ende i mban mend qëndrimet autoritare dhe dhunën sistematike me qëllim të nënshtrimit të sistemit të arsimit. Që nga paslufta, përgjatë muajit të kaluar, është hera e parë që mësimdhënësit e përjetuan të njëjtën situatë. Ule dinjitetin e mësimdhënësve dhe do të kesh popull të nënshtruar dhe pa mendim kritik”.
Kujtojmë se nga 25 gushti SBAShK-u mori vendim për bllokimin e procesit mësimor përmes grevës deri në përmbushjen e kërkesave të tyre – 100 euro shtesë deri në miratimin e Ligjit për Paga./KlanKosova/
