Kompani e hulumtimeve UBO Consulting ka kryer një hulumtim në lidhje me temat të cilat, aktualisht, i preokupojnë qytetarët e vendit, transmeton Fol Drejt.
OMNIBUS është një matje që bëhet me 1065 qytetarë, ku institucionet, organizatat dhe bizneset mund të vendosin pyetjet e tyre për të kuptuar qëndrimin e opinionit publik lidhur me një temë të caktuar.
UBO Consulting, marrë parasysh zhvilimet e fundit në botë, rajon dhe vend, ka vendosur që të bëjë disa pyetje aktuale për të parë disponimin e opinionit lidhur me temat e ndryshme.
Duket se vazhdon të ekzistojë një disponim i lartë i qytetarëve për anëtarësim në NATO dhe BE.
95.1% e të anketuarve në pyetjen “A duhet të anëtarësohet Kosova në NATO” janë përgjigjur me po, 4% jo ndërsa 0.9% “Nuk e di”.
Ngjashëm, në pyetjen se “A duhet të anëtarësohet Kosova në BE”, 93.9% e qytetarëve janë përgjigjur për po, 5.2% jo dhe 0.9% nuk e di.
Në këtë pyetësor janë pyetur qytetarët e të gjitha etnive. Tek shqiptarët 99.4% janë përgjigjur pro anëtarësimit në NATO, 0.4% kundër dhe 0.2% “nuk e di”. Ndërsa tek serbët, asnjë nuk është përgjigjur pro, 86% kundër dhe 14% “nuk e di”. Minoritetet tjera janë përgjigjur 90.7% pro anëtarësimit në NATO, 4.7% kundër dhe 4.7% nuk e di.
Për pyetjen e anëtarësimit në BE, sipas etnive, shqiptarët janë përgjigjur me 98.3% pro anëtarësimit, 1.5% kundër dhe 0.2% kanë abstenuar. Serbët janë përgjigjur në mënyrë identike si për anëtarësimin në NATO, asnjë nuk është përgjigjur pro anëtarësimit në BE, 86% kundër dhe 14% nuk e di. Ndërkaq minoritetet tjera janë përgjigjur 90.5% pro anëtarësimit në BE, 7.1% kundër dhe 2.4% nuk e di.
Përzgjedhja e amvisërisë duke shfrytëzuar metodën sistematike të rastësisë, si dhe zhvillimi i anketës me personin i cili e ka ditëlindjen e parë më të afërt i moshës mbi 18 vjet. Pyetësori është realizuar me 1065 të anketuar. Pyetësori është realizuar nga data 7 mars deri më 15 mars 2022 në 38 komuna të Kosovës dhe ka nivel të besueshmërisë prej 95% me marzhë të gabimit prej +-3 pikë të përqindjes./FolDrejt/
