Muaj më parë, saktësisht më 26 janar të këtij viti, pas një darke pune që e kishte zhvilluar një natë më parë me Përfaqësuesin Special të Bashkimit Evropian (BE), Miroslav Lajçak, Kryeministri i Republikës së Kosovës Albin Kurti pat thënë para mediave se pala serbe po iu qaset marrëveshjeve të arritura në mënyrë selektive, shkruan Fol Drejt.
Kurti qe pyetur në mënyrë ekskluzive nëse ishte pajtuar në parim për themelimin e Asociacionit të komunave me shumicë serbe, një entitet ky të cilin Qeveria e Serbisë e konsideron si kyç, e herë, herë edhe kusht të patejkalueshëm në procesin e bisedimeve me Kosovën, ai pat thënë se, duhet të ketë një rend logjik në zbatimin e marrëveshjeve.
E pala serbe duket më skeptike për sa i përket çështjes në fjalë.
Siç paralajmëroi Kryeministrja e Serbisë Ana Brnabiq ditë më parë për çështjen e Asociacionit, “Prishtina nuk e ka ndërmend të zbatojë atë që është marrë vesh, kurse Kurti nuk dëshiron të thotë fjalët e Marrëveshjes së Brukselit”.
E në prononcimin për gazetarët më 26 janar të këtij viti, Kryeministri Kurti insistonte që marrëveshjeve nuk duhet t’iu qasemi së prapthi:
“Çështja e të drejtave të pakicave, çështja e marrëveshjeve të mëhershme në Bruksel është përbrenda këtij propozimi të BE-së. Nuk mund ta nxjerrim qerren para kalit. Së pari kali, pastaj qerrja. Pra, nuk mund të përzgjedhësh një nen të caktuar me interpretim të njëanshëm dhe ta sjellësh para propozimit”.
Kurti madje shkonte aq larg sa që, sipas tij, procesi besonte se duhej ta ndiqte një rend edhe më logjik. Në një intervistë për mediumin turk TRT ai e pat përsëritur qëndrimin se së pari duhet të arrihet njohja reciproke, dhe vetëm atëherë mund të ketë Asociacion bazuar në ato 6 kushte që ai ka shtruar:
“Ne duhet të jemi të kujdesshëm dhe të jemi të drejtë dhe çfarë unë po shtroj si kushte për çfarëdolloj asociacioni, nuk janë qëndrimet e mia arbitare, as dëshirat personale, është vullneti i popullit në Kosovë, kushtetutshmëria dhe ligjshmëria, janë ato që më bëjnë të them se së pari duhet të kemi njohjen reciproke dhe vetëm atëherë çfarëdolloj Asociacioni”, pat thënë Kurti ndër të tjera në këtë intervistë.
Mirëpo, Zëvendëskryeministri Besnik Bislimi, në një intervistë të dhënë për mediumin serb “Danas”, e ka pranuar se pala kosovare e ka bërë një lëshim të madh në kuadër të procesit, pikërisht për faktin se iu ishte shmangur rrjedhës logjike të procesit:
“Me Marrëveshjen Bazike (27 shkurt) Serbia është pajtuar që ta trajtojë Kosovën si një anëtare të barabartë sovrane, ka njohur integritetin tonë territorial, ka rënë dakord të mbajë marrëdhënie normale si me të gjithë fqinjët e tjerë dhe të mbështesë anëtarësimin e Kosovës në organizatat ndërkombëtare. Ne e kuptojmë se njohja formale nuk është aty dhe ky ishte një lëshim i madh i Kosovës. Është e rëndësishme që ne të ndërtojmë marrëdhënie të qëndrueshme si anëtarë të barabartë të bashkësisë ndërkombëtare”, është deklaruar Bislimi.
Ua kujtojmë se shpjegimi i Bislimit për procesin e bisedimeve, vjen pak ditë pas takimit që pritet të kenë dy krerët e shteteve në Bruksel. Në opinionin publik në Kosovë, por edhe më gjerë, pakkush beson se ky takim do të sjell diçka konkrete./FolDrejt/
