Kosova është duke u përballur me një krizë të re: atë energjetike. Befas, qytetarët kanë filluar të përballen me reduktime, ndërsa shigjetat e pakënaqësisë janë kthyer nga qeveria, transmeton Fol Drejt.
Por a është sadopak fajtore Qeveria Kurti për këtë Krizë? A ka mundur ta menaxhojë, e për rrjedhojë shmangë më lehtë?
Sipas burimeve të Fol Drejt, Qeveria e Republikës së Kosovës, përkatësisht Kryeministri Albin Kurti, ishte paralajmëruar që në verë për një krizë të tillë. Po sipas këtyre burimeve, nga miqtë ndërkombëtarë, atij i është sugjeruar investimi në një projekt gjigant, nëpërmjet të cilit, vendi do t’i përballonte krizat e tilla, me lehtësi.
“Ju kërkojmë ndjesë për këtë shqetësim të vonë mbrëmjesor, megjithatë ky mesazh është i një rëndësie dhe urgjence të madhe. Për detaje dhe informacione të mëtejshme jeni të lutur të kontaktoni në (….). Vëmendja juaj për këtë çështje vlerësohet shumë!” – besohet se kanë qenë fjalët e pakta të mesazhit që u është dërguar Kryeministrit Kurti dhe Ministres së Jashtme Donika Gërvalla Schwarz.
Fol Drejt ka bërë përpjekje për t’i verifikuar këto burime, por Qeveria dhe Ministria e Jashtme e Kosovës, nuk kanë dhënë përgjigje.
Si erdhi deri te kriza?
Sipas Agjencisë së Statistikave të Kosovës (ASK), në tremujorin e tretë të vitit 2020 “vlera e gjithmbarshme e prodhimit të thëngjillit ishte rreth 1 896.8 milion ton. Kurse, sasia bruto e energjisë elektrike, e prodhuar në termocentrale është 1 537.6 GWh, dhe në hidrocentrale është rreth 43.2 GWh.”
Në po të njëjtën periudhë, në këtë vit “vlera e gjithmbarshme e prodhimit të thëngjillit ishte rreth 1.88 milionë ton. Kurse, sasia bruto e energjisë elektrike, e prodhuar në termocentrale ishte 1 358.2 GWh dhe në hidrocentrale ishte rreth 41.1 GWh.”
Përkundër ndryshimeve jo të vogla, besohet se kriza është ndikuar më shumë nga kriza globale energjetike.
“Si reflektim i rritjes së theksuar të konsumit të energjisë elektrike në vend, pamjaftueshmërisë së gjenerimit të brendshëm për të mbuluar konsumin dhe krizës globale energjetike që ka rezultuar me rritjen enorme të çmimit të energjisë elektrike në bursat ndërkombëtare, sistemi Elektro-Energjetik i Kosovës aktualisht është duke u përballur me vështirësi të theksuara. Vështirësitë në furnizim me energji elektrike janë paraqitur sidomos gjatë muajit dhjetor 2021 për shkak të avarive të shkaktuara në gjeneratorët e termocentralit “Kosova B” dhe njëkohësisht rritje të theksuar të konsumit të energjisë elektrike” – thuhet në njoftimin zyrtar të lëshuar nga Zyra për Komunikim Publik (ZKM), në kuadër të Kryeministrisë, për sa i përket Mbledhjes së 51-të të Qeverisë.
Por a është rritur konsumi?
Sipas të gjeturave të ASK-së, në tremujorin e fundit të këtij viti, “sasia e energjisë elektrike e konsumuar është rritur për 23.11%.” Ndryshe nga viti i kaluar, në kjo periudhë e vitit, pasqyronte të dhëna të tjera (më pozitive):
“Sasia e energjisë elektrike për konsum, në këtë tremujor, ishte 914.5 GWh energji elektrike. Në raport me tremujorin e njëjtë të vitit të kaluar (TM3 2019), sasia e energjisë elektrike e konsumuar është ulur për 11.6%.”
Kriza prodhon krizë
Partitë opozitare, shoqëria civile, përkatësisht pjesa më e madhe e opinionit publik, është kthyer në arenë kritikash kundër qeverisë.
““10 ditë më parë kishte rënie të A3 dhe A5 me mungesë të shtuar të energjisë elektrike. Kërkojmë menjëherë një hetim të organeve përgjegjëse dhe ekspertëve të fushave, pasi rënia e dy blloqeve përnjëherë duket që ka qenë e qëllimshme dhe e shkaktuar nga KEDS-i” – tha sot në një paraqitje për media, Kryetari i Partisë Socialdemokrate Dardan Molliqaj.
“Nëse vërtetohet se ka qenë veprim me qëllim, i bie që KEDS në bashkëpunim me qeverinë dhe menaxhmentin e ri të KEK-ut ka pas synim të dëmtojë reputacionin e KEK-ut dhe të thuhet se mungesa e energjisë ka të bëjë më problemet me KEK.”
Deklarata po kaq të ashpra, janë dhënë fillimisht nga krerët e partive parlamentare. Ato kanë kërcënuar me rrëzim të Qeverisë Kurti, edhe më herët, për arsye të tjera, por a do ta gjunjëzojë atë kriza energjetike? Kjo mbetet të shihet./FolDrejt/
