Pas dy Kupave të Botës dhe tre finaleve, disa shpresojnë se skuadra e këtij viti do të ngrejë edhe një herë trofeun prestigjioz, shkruan Al Jazeera, përcjell Fol Drejt.
Gati 30 vitet e dhimbjes së Argjentinës në ndeshjet e rëndësishme finale përfunduan vitin e kaluar kur fituan Kupën e Amerikës dhe skuadra e Lionel Scaloni do të shkojë në Kupën e Botës me vetëbesim nga ai triumf në Brazil.
Pasi humbi për herë të fundit në Copa America 2019, kombëtarja argjentinase, La Albiceleste, fluturoi në Katar pas një serie prej 35 ndeshjesh të pamposhtur dhe si një nga favoritët e fortë për të thyer dominimin 16-vjeçar të shteteve të Evropës në Kupën e Botës.
Pjesa më e madhe e meritave për fitoren e një finaleje të rëndësishme pas gjashtë tentativave të dështuara i takon Scalonit, lojtarit 44-vjeçar që u ngrit nga roli i asistentit te menaxheri i dënuar Jorge Sampaoli, në kujdestar dhe përfundimisht shef i përhershëm i kombëtares.
Federata Argjentinase e Futbollit ia besoi projektin e rindërtimit Scalonit, i cili mori përsipër pas daljes së tyre nga Kupa e Botës 2018 në 1/16 dhe me të në krye Argjentina pasoi fitoren e Kupës 2021 duke mposhtur me lehtësi Italinë fituese të Euros në “Finalissima” të qershorit.
Argjentina kishte qenë një skuadër favorite për vite të tëra me një luks opsionesh për të zgjedhur në sulm, por u zhgënjye nga një mbrojtje dhe mesfushë që pranuan gola. Veprimi i parë i Scalonit ishte të ndryshonte atë.
U larguan lojtarët e moshuar dhe erdhën lojtarë të rinj e të uritur, ndërsa Scaloni zbatoi vizionin e tij për një ekip të suksesshëm që më vonë do të quhej “La Scaloneta” – shtëpia e ndërtuar nga Scaloni.
Portieri Emiliano Martinez, qendërmbrojtësi Cristian Romero dhe mesfushori Rodrigo De Paul formuan shtyllën kurrizore të skuadrës së re, pasi Scaloni gjeti lojtarë të aftë për të hequr një pjesë të barrës nga supet e Lionel Messit.
Loja e tyre e bazuar në zotërimin e topit, me lojtarë të tillë si Giovani Lo Celso, Leandro Paredes dhe De Paul që diktojnë ritmin, e liroi Messin të përfshihej më tej në fushë ku është më vdekjeprurës.
Magjistari i tyre është inkurajuar nga ndryshimet dhe mprehtësia taktike e Scalonit, duke u bërë më i vendosur për të performuar mirë për Argjentinën dhe madje duke luajtur me lëndime në gjysmëfinale dhe finale të Copa America.
“Scaloni është njëri prej nesh”, tha Messi. “Ishte ai që përzgjodhi kombëtaren, ai që besoi, ai që mori drejtimin në një moment të vështirë. Ai na jepte besim, po sillte njerëz të rinj, ai e dinte gjithmonë se çfarë donte dhe ne u rritëm. Nga Copa America 2019, ne bëmë një hap para”.
35-vjeçari ishte lojtari më i mirë në Kupën e Botës 2014, kur ai ishte shumë afër përsëritjes së suksesit të Diego Maradonës duke e çuar Argjentinën drejt lavdisë së Kupës së Botës, por u mposhtën në finale nga një skuadër superiore siç ishte ajo e Gjermanisë.
Messi është i vetmi lojtar i mbijetuar nga ai formacion fillestar në stadiumin Maracana. Por këtë herë ai ka mbështetjen e një skuadre të ndërtuar nga Scaloni për të fituar jo thjesht ndeshje, por tituj.
Argjentina është në grup me Arabinë Saudite, Meksikën dhe Poloninë. /FolDrejt/
