Kriza e re e bisedimeve sipas Daniel Serwer është duke reflektuar tashmë në shumë dimensione. Sipas ekspertit amerikan për çështje të Ballkanit, ka paralajmëruar incidente të reja në veri të Kosovës, nëpërmjet së cilave Beogradi synon ta krijojë narracionin e ri: që Qeveria e Kosovës nuk është e aftë ta menaxhojë veriun, shkruan Fol Drjet.
“Bashkimi Evropian (BE), po paralajmëron për dhunë të mundshme për shkak të këtij ngërçi. Kjo është realiste. Beogradi ka shkaktuar disa herë dhunë gjatë vitit të kaluar në veri të Kosovës me shumicë serbe. Serbia po përpiqet të tregojë se Kosova nuk mund të qeverisë atje dhe të bëjë që amerikanët dhe evropianët të bindin Prishtinën që ta lejojë Beogradin ta bëjë këtë përmes Asociacionit të Komunave me Shumicë Serbe. Kurti nuk po blen, jo vetëm sepse dëshiron të mbrojë sovranitetin dhe integritetin territorial të Kosovës, por edhe sepse Serbia, SHBA dhe BE po i ofrojnë pak në këmbim”, ka thënë Serwer.
Ndërsa amerikanët, sipas tij, janë përqendruar në “qetësim të Beogradit”, presioni ka rënë mbi Kosovën, e cila është e vendosur ta ruaj sovranitetin e saj.
Për më shumë, Serwer ka propozuar që procesi të synohet të rikthehet në binarë më produktiv. “Procesi i Berlinit është vendi i duhur” sipas tij.
Faqet e para të gazetave sot në Beograd janë mbuluar me ngjarjen e rëndë e cila ndodhi dje në Beograd. Megjithatë kjo nuk i ka kursyer kritikët e Aleksandër Vuçiqit që ta akuzojnë këtë të fundit se po i shfrytëzon edhe këto raste në dobi të “populizmit” të tij.
Zoran Lutovac, kryetar i Partisë Demokratike në Serbi, për Danas ka thënë se fjalimi i Presidentit të Serbisë për rastin e tragjedisë në Beograd ishte “krejtësisht i papërshtatshëm.” Sipas tij Vuçiq “është psikiatër dhe inspektor, prokuror dhe avokat dhe gjykatës dhe ekspert dhe psikolog social.”
Duke komentuar fjalimin e presidentit, pas tragjedisë së tmerrshme që ndodhi dje në shkollën fillore Vladislav Ribnikar ku humbën jetën nëntë persona, Lutovac thotë se Vuçiq tregoi se ai është para së gjithash një populist autoritar që tragjedinë e kalon përmes filtrit politik.
“Ai edhe kësaj here nuk e ka humbur rastin të flasë në emër të të gjitha institucioneve dhe të tregojë edhe një herë se në çfarë autokracie jetojmë”, thekson kreu i DS.
Ai gjithashtu shton se Vuçiq ka shfrytëzuar rastin të flasë për Kurtin, Kosovën dhe mënyrën se si e kanë trajtuar në Bruksel, për rrugët e ndërtuara, edhe në momente tragjedie si kjo.
Siç konstatoi Serwer në analizën e tij, në Beograd ka mjaft media të cilat ushqejnë çdo ditë urrejtjen ndaj shqiptare, për ta mbajtur gjallë frymën nacionaliste.
Arritjet dhe dështimet e Brukselit kanë shtyrë edhe Zëvendës Ndihmës Sekretari Amerikan i Shtetit Gabriel Escobar të jap llogari për rastin e aplikimit të Kosovës në Këshillin e Evropës. Sipas tij, nuk bëhet fjalë për një fitore por për një obligim.
Këshilli i Evropës ka obligim të sigurojë zbatimin e standardeve dhe lirive demokratike, tha Escobar, duke pohuar se statusi i pakicës serbe në Kosovë është hapi i ardhshëm i Këshillit të Evropës.
Ne duhet të shohim progres në lidhje me shqetësimet e justifikuara të komunitetit serb në veri të Kosovës dhe mos zbatimit të disa dispozitave kushtetuese, duke përfshirë mbrojtjen e manastirit në Deçan, tha Eskobar, duke shtuar se Beogradi dhe Prishtina janë të interesuar që të arrijnë një marrëveshje për normalizimin e marrëdhënieve.
Ata nuk do të ishin në Ohër ose nuk do të pranonin një marrëveshje ligjërisht të detyrueshme nëse nuk do të ishin serioze, dhe “Bashkimi Evropian dhe SHBA janë po aq seriozë në këtë”, citohet të ketë thënë Eskobar.
Ndërkohë që në Kosovë dhe Serbi po vijon të analizohet takimi i fundit në Bruksel, zëra që paralajmërojnë rrezikun nga tensionet e reja në veri të vendit, nuk po mungojnë.
Në një artikull të publikuar në New York Times, konfirmohen lidhjet e presidentit serb Aleksandër Vuçiç, me huliganin dhe trafikantin e kokainës, Veljko Belivuk.
Sipas artikullit, prej vitesh banditët dhe huliganët serbë të futbollit janë involvuar në politikën e paqëndrueshme të rajonit dhe ndihmuan nxitjen e kryengritjeve serbe në vendet tjera të Ballkanit, përfshirë ato në veri të Kosovës.
“Rreziqet më të dukshme sot janë të përqendruara në Kosovë”, vijon artikulli, duke paralajmëruar një skenar të rrezikshëm i cili mund t’i tronditë perëndimorët:
“Skenari që mban zgjuar gjatë natës liderët perëndimorë është në njëfarë mënyre kështu: Vuçiç, duke përmendur një rrezik për minoritetin serb, dërgon trupa përtej kufirit dhe anekson veriun e Kosovës. Serbët në pjesë të tjera të rajonit pastaj largohen nga shtëpitë e tyre ose kërkojnë më shumë ndryshime kufijsh”.
Këto paralajmërime janë sinjale të qarta për politikën zyrtare të Kosovës, e cila, sipas njohësve të zhvillimeve politike në vend, duhet të tregohet e kujdesshme./FolDrejt/
