Vitin që e lamë pas, Ministria e Arsimit, Shkencës, Teknologjisë dhe Inovacionit (MAShTI), ndau një grant prej 1 milion e 700 mijë euro për mësimdhënësit me probleme. Por për sivjet, ende nuk dihet nëse kjo ministri do të vijojë të kujdeset për këtë kategori të punëtorëve në sektorin publik, shkruan Fol Drejt.
Një kërkesë e tillë ka qenë e kahershme, e artikuluar edhe nga Sindikata e Arsimit. Sipas Radio Kosovës, kryetari i kësaj sindikate Rrahman Jasharaj ka thënë se ndonëse kjo gjë pat filluar mbarë, për sivjet ende nuk dihet nëse do të vazhdojë mbështetja:
“Kuptimi ka qenë që ata të merren me sëmundjet e tyre, shërimin, ndërsa në vend të tyre të vijnë kolegët e rinj që ishin të papunë. Kjo gjë filloi mbarë. Sivjet nuk kemi informacione dhe ka disa vërejtje në disa komuna, që kjo nuk po realizohet. Uroj që MASHT të vazhdojë këtë veprim që e kemi duartrokitur vitin e kaluar. Uroj që edhe në vitin 2023, MASHT të ndajë mjete të mjaftueshme, pasi këta mësimdhënës nuk kanë asnjë mundësi, sepse shëndeti i tyre është i rënduar. Ata në klasë patën shkuar për të ruajtur vendin e punës dhe për të ruajtur pagën për të ushqyer fëmijët e tyre.”
Ai ka kërkuar që kjo kategori mësimdhënësish të lirohen tërësisht nga detyra, por të marrin pagën, ndërkohë të kenë mundësi të merren me sëmundjet e tyre.
MAShTI nuk i ka kthyer përgjigje Radio Kosovës, rreth kësaj pyetjeje, por sipas të dhënave të sindikatës, numri i mësimdhënësve me probleme shëndetësore është rreth 400./FolDrejt/
