Kryeministri i Malit të Zi Dritan Abazoviq dhe ai i Shqipërisë Edi Rama zhvilluan sot në Podgoricë një seancë të përbashkët të qeverive të Malit të Zi dhe Shqipërisë, raporton Klix, përcjell Fol Drejt.
Ndonëse në fokus të seancës ishte ndërtimi i urës në lumin Bojana, Abazoviq dhe Rama prekën çështje të shumta rajonale.
“Ne duam të bëjmë gjithçka në segmentet e tjera për të thënë se Mali i Zi dhe Shqipëria shohin një perspektivë të madhe në marrëdhëniet dhe bashkëpunimin që duhet të çojë në një jetë më të mirë për qytetarët e dy vendeve. Ne shohim një të ardhme të përbashkët në BE dhe duam të kontribuoni në dërgimin e këtij mesazhi. Mendoj se janë marrëdhëniet mes dy qeverive që janë shembull në Ballkanin Perëndimor, besoj se këtë shembull duhet ta ndjekin edhe vendet e tjera të rajonit dhe Qeveria e Malit të Zi do të mbetet e përkushtuar për të mbajtur të përbashkët seancat me qeveritë e tjera në rajon… Të gjithë së bashku mund të përparojmë”, tha Abazoviq.
Gjithashtu u diskutuan nismat ekonomike rajonale si Ballkani i Hapur dhe Procesi i Berlinit.
“Dhe në samitin e ardhshëm, pasi edhe të tjerët të japin pëlqimin e tyre, të gjitha vendet do të ftohen të jenë pjesë e nismës. Të dy iniciativat janë plotësuese dhe të nevojshme për njëra-tjetrën. Nuk mund të mjaftohemi vetëm me udhëheqjen e procesit të Berlinit, që është një proces ballkanik, por duhet të vëmë forcat në dispozicion për të sjellë në jetë idetë që janë baza e procesit të Berlinit. Me nënshkrimin e marrëveshjeve të sotme kemi kontribuar në realizimin e disa ideve”, tha Rama.
Rama deklaroi se ka nisur puna e konsorciumit të Shqipërisë, Malit të Zi, Bosnje-Hercegovinës dhe Kroacisë, lidhur me gazsjellësin Adriatiko-Jonian.
“Ai projekt do të përshpejtohet nëse ka bashkëpunim ndërshtetëror”, shtoi ai.
Edhe kryeministri i Malit të Zi Dritan Abazoviq theksoi se të dyja iniciativat janë të rëndësishme për vendet e Ballkanit Perëndimor.
“Unë e mbështes atë. Nëse asgjë tjetër, Ballkani i Hapur ringjalli procesin e Berlinit. Koka mund të dhemb vetëm nëse nuk kemi komunikim, nëse e shohim njëri-tjetrin si armiq”, përfundoi Abazoviq. /FolDrejt/
