Kreu i LDK-së, Lumir Abdixhiku, po vazhdon takimet në kuadër të vizitës zyrtare në SHBA.
Përmes një postimi në facebook, Abdixhiku ka bërë të ditur se ka takuar kongresmenin democrat Ritçie Torres, i cili njëkohësisht është bashkëkryesues i Grupit për Shqiptarët në Kongresin Amerikan.
“Patëm një diskutim të hapur e shumë përmbajtësor mbi zhvillimet e fundit në Kosovë e rajon. Biseduam dhe për aspiratat e popullit të Kosovës në rrugëtimin euroatlantik si dhe domosdoshmërinë e përfshirjes së SHBA-ve në këtë rrugëtim. Si njohës i mirë i çështjes shqiptare dhe nevojave të Republikës sonë, Kongresmeni Torres ofroi mbështetje të parezervë.”, ka shkruar Abdixhiku.
“E falënderova për gjithë kontributin e dhënë në Kongres. Në veçanti, populli ynë do të jetë gjithmonë mirënjohës për angazhimin e pandalshëm të tij drejt zbardhjes së fatit të të zhdukurve dhe nevojës për vënie të drejtësisë nga lufta e fundit në vend.”, ka shtuar ai tutje.
Abdixhiku ka bërë me dije se kongresmeni Torres do ta vizitojë Kosovën këtë javë.
“Kongresmenin Torres do të jetë këtë javë për vizitë në Kosovë. Përveçse do të gjej një vend të bukur me histori plot, do të gjej dhe një popull mirënjohës për rolin e SHBA-ve në Kosovë.”, ka përfunduar postimin e tij kreu i LDK-së./FolDrejt/