Në dhjetë vjetorin e saj, Akademia për Qeverisje Lokale “Lokal Governance Academy” (LGA), ka zgjedhur pjesëmarrëset e pjesëmarrësit e gjeneratës së nëntë në kuadër të programit për qeverisje lokale në Republikën e Kosovës.
Nga Gëzim Olluri – FolDrejt
Në LGA ishin të pranishëm figura që aktivizohen në vazhdimësi ndër vite në Legjislativin dhe Ekzekutivin Komunal e gjithashtu edhe aktivistë nga shoqëria civile që merren me aktivitete në dobi të qytetarisë. Sipas LGA në fokus ishte trajtimi dhe shtjellimi i koncepteve të qeverisjes lokale, modeleve rajonale dhe europiane të funksionimit të komunave dhe organizimin e qeverisjes lokale në Republikën e Kosovës.
Listimi i të përzgjedhurëve nga LGA:
Liridona Bislimi, është këshilltare komunale në Viti në mandatin e saj të dytë. Bislimi është gruaja më e votuar në Viti nga të gjitha gratë pjesëmarrëse të të gjitha partive në zgjedhjet lokale të vitit të kaluar. Ajo vjen nga radhët e Lëvizjes Vetëvendosje (LVV) dhe ka vite që qëndron pranë halleve të qytetarëve si aktiviste e zellshme. Juristja vitiase është e diplomuar në drejtimin e Edukimit në Universitetin e Gjilanit “Kadri Zeka” dhe aktualisht studion në nivelin master në drejtimin – Qeverisja Lokale dhe Shoqëria Demokratike në të njëjtin universitet. Nga fondacioni “Atifete Jahjaga” dhe ambasadorja e Holandës, Carin Lobbezoo “NL Netherlands”, në mars të këtij viti, Liridona është zgjedhur njëra nga dhjetë gratë më të suksesshme në Republikën e Kosovës. Në Viti e më gjerë ajo njihet si shembull për vajzat e reja për rrugëtimin politik përballë barrierave të shumta.
Ekrem Berjani, është drejtor për Zhvillim Ekonomik në Fushë Kosovë. Sipas LGA, Berjani ka përvojë 15 vjeçare si menaxher dhe drejtor. Berjani i ka përfunduar studimet e nivelit master në Financa dhe Kontabilitet Ndërkombëtar.
Jeta Rafuna-Hasani, është këshilltare komunale në Prishtinë në mandatin e saj të dytë. Aktualisht ajo është shefe e Grupit Parlamentar në Kuvendin Komunal të Prishtinës. Të dhënat e LGA bëjnë të ditur se Rafuna-Hasani ka kryer trajnime të ndryshme dhe është e certifikuar nga organizata vendore dhe ndërkombëtare me fokus në qendër zhvillimin e karrierës si trajnere për të drejtat e njeriut.
Besnik Imeri, është drejtor për Financa, Ekonomi dhe Zhvillim në Viti. Imeri është i profilizuar në fushën e Shkencave në Ndërmarrësi dhe Zhvillim Ekonomik Lokal. Ndër të tjera, Imeri ka punuar edhe si konsulent në organizata vendore dhe ndërkombëtare.
Linda Shahini, është zyrtare për Integrime Europiane. Shahini ka qenë asambleiste në dy mandate në Komunën e Lipjanit dhe nga viti 2018 është aktivizuar si zyrtare për Integrime Europiane.
Avni Gashi, është udhëheqës i sektorit të kuvendit në Pejë. Gashi ka përfunduar studimet në Fakultetin Juridik dhe është master i shkencave në Universitetin e Prishtinës “Hasan Prishtina. Për rezultatin e kontributit të tij në punëtori të ndryshme, është vlerësuar dhe certifikuar nga organizata vendore dhe ndërkombëtare.
Flutura Beqiri, është asistente administrative në drejtorinë e administratës në Rahovec. Beqiri i ka kryer studimet në Fakultetin e Edukimit në Universitetin e Prishtinës “Hasan Prishtina”. Fillimisht, Flutura Beqiri për një periudhë pesë vjeçare ka qenë e aktivizuar në sektorin privat, ndërsa për një periudhë katër vjeçare punon në Komunën e Rahovecit.
Osman Bllaca, është ushtrues detyre i Drejtorit të Njësisë së Auditimit të Brendshëm. Bllaca ka studiuar në drejtimin “Banka, Financa dhe Kontabilitet” në Fakultetin Ekonomik në Universitetin e Prishtinës “Hasan Prishtina”. Sipas informacioneve nga LGA, Bllaca aktualisht është duke i vijuar studimet post-diplomike master në drejtimin “Tregjet financiare dhe bankat”. Ka qenë i angazhuar edhe në sektorin bankar dhe në Ministrinë e Aministratës Publike në zyrën për buxhet dhe financa.
Tringa Kasemi, është aktiviste e shoqërisë civile. Kasemi ka dhjetë vite që kontribuon si aktiviste e shoqërisë civile për të mirën e përgjithshme dhe për të drejtat e njerëzve. Pikat kyçe ku Tringa aktivizohet janë transparenca, llogaridhënia në nivel lokal, barazia gjinore dhe lufta kundër dhunës në baza gjinore. Tringa Kasemi është juriste e diplomuar në Universitetin e Prishtinës “Hasan Prishtina”.
Fadil Ademi, është zyrtar ligjor në Drejtorinë e Administratës së Përgjithshme në Gjilan. Ademi i ka përfunduar studimet në nivelin bachelor dhe master në Fakultetin e Edukimit në Universitetin e Prishtinës “Hasan Prishtina”.
Hyra Bytyqi, është zyrtarë për Marrëdhënie me Publikun në Lipjan. Bytyqi i ka përfunduar studimet e nivelit bachelor në kolegjin AAB në drejtimin “Banka, Financa dhe Kontabilitet”. Gjithashtu edhe studimet master në drejtimin: Menaxhment dhe Informatikë.
Burim Gashi, është udhëheqës i sektorit për shërbime me qytetarë. Ka studiuar master në drejtimin e Administrimit Publik dhe ka përvojë dhjetë vjeçare në Komunën e Lipjanit.
Arbnore Ademi, është zëdhënëse në KRM “Pastrimi”. Ademi ka diplomuar në degën Letërsi e Përgjithshme dhe Krahasimtare në Fakultetin e Filologjisë në Universitetin e Prishtinës “Hasan Prishtina” dhe studimet master në kolegjin ISPE në drejtimin Politikat e Bashkimit Europian. Arbnore Ademi ka qenë pjesë e Agjencisë së Lajmeve “Kosova Press”.
Hasan Gjyrevci, është zyrtar i lartë për Kuvend dhe Komitete në Fushë Kosovë. Gjyrevci ka qenë i angazhuar në hartimin dhe projektimin e projekteve, planeve, rregulloreve, strategjive në nivel lokal dhe të trajnimeve.
Time Hasani, është aktiviste e shoqërisë civile. Hasani është e diplomuar në Fakultetin Filozofik në Universitetin e Prishtinës “Hasan Prishtina”. Të dhënat nga LGA shkruajnë se ajo është e angazhuar si përfaqësuese në Këshillin Rinor në Gjakovë. Ka qenë e pranishme në trajnime dhe programe që për tematikë kanë pasë tema nga fusha e politikës dhe ajo sociale në organizata të ndryshme.
Valon Zherka, është aktivist i Shoqërisë Civile. Është i diplomuar në drejtimin Administrim i Biznesit në Universitetin e Pejës “Haxhi Zeka”. Zherka ka organizuar aktivitete të ndryshme të punës dhe ka aftësi në shfaqjen dhe shpjegimin e produkteve dhe shërbimeve për bashkëpunëtorët potencialë afaristë.
Tringë Arifi, është aktiviste e Shoqërisë Civile. Është e diplomuar në Fakultetin Juridik në Universitetin e Prishtinës “Hasan Prishtina” dhe aktualisht vijon studimet në nivelin master në drejtimin Mjekësi Ligjore dhe Teknologji Kompjuterike. Tringa është e certifikuar nga organizata vendore dhe ndërkombëtare.
Adnan Ramadani, është aktivist i Shoqërisë Civile në Viti. Fokusi i ativizimit të Ramadanit ka qenë aktivizmi qytetar dhe monitorimi i pushtetit lokal në Viti. Ramadani angazhohet në organizata të ndryshme dhe studion në shkenca sociale.
Instituti KLGI ka për fokus analizat dhe studimet, të cilat kontribuojnë në qeverisjen lokale të Republikës së Kosovës. “Instituti KLGI është i përkushtuar analizave dhe studimeve që i kontribuojnë praktikave efektive të qeverisjes lokale në Kosovë. Po ashtu, nëpërmjet programeve edukative punon në ngritjen e kapaciteteve të komunave të vendit”, thuhet ndër të tjera në shkrimin e Akademisë Lokale për Qeverisje.
Aktiviteti i LGA është organizuar në kuadër të programit “Dialogu për Komunat Evropiane”, i mbështetur dhe i përkrahur nga ambasade e Mbretërisë së Norvegjisë në Kosovë./FolDrejt/
