Këtë të enjte ka vazhduar aksioni i Policisë së Kosovës i koduar “Brezovica”, ku janë bastisur nëntë lokacione në tri komuna – Shtërpcë, Ferizaj dhe Prishtinë – si dhe disa zyra në Ministrinë e Mjedisit.
Lidhur me këtë aksion, prokurori i çështjes, Rasim Maloku, ka bërë të ditur se nga të dhënat financiare që prokuroria ka siguruar nga bankat deri më tani të dyshuarve iu janë ngrirë afro 6 milionë euro.
“Më e rëndësishmja është se gjatë zhvillimit të hetimeve nga të dhënat financiare që i kemi siguruar nga bankat që posedojnë të pandehurit dhe familjarët deri më tani kemi ngrirë afro 6 milionë euro”, ka deklaruar ai në një konferencë për media.
Ndërsa, kapiteni i Policisë së Kosovës për rajonin e Ferizajt, Agron Haziri, bëri të ditur se tre nga të arrestuarit në këtë aksion, me urdhër të prokurorit, janë dërguar në mbajtje për 48 orë, ndërsa një është liruar në procedurë të rregullt.
Ai ka njoftuar po ashtu se pesë persona janë në kërkim, pasi të njëjtit nuk janë gjetur në lokacionet e banimit gjatë bastisjes.
Haziri ka treguar se gjatë aksionit të sotëm është konfiskuar një veturë, armë, videokaseta dhe një uniformë e policisë së ish-sistemit jugosllav.
“Gjatë kontrollit të sotëm janë konfiskuar një veturë BMW X1, armë CZE, Zastava, 163 fishekë, një kuti me armë, një karikator i zbrazur, një shtëpizë kompjuteri, telefon mobil, USB, pesë video-kaseta, uniformë me mbishkrimin “Policia” e ish-sistemit jugosllav, një antiplumb dhe dokumente të ndryshme”.
