Pas votimit në Këshillin e Evropës për anëtarësimin e Kosovës në atë institucion ndërkombëtar, Greqia mund të ndryshojë qëndrimin e mëparshëm dhe të njohë pavarësinë e Kosovës. Ky sot është lajmi kryesor në mediat e kontrolluara nga presidenti serb Aleksandar Vuçiq, transmeton Fol Drejt.
Këtë indirekt e ka bërë të ditur Georgios Katrougalos, ish-shefi i diplomacisë greke, i cili thotë se qeveria në Athinë papritmas mori një qëndrim të prerë për mosnjohjen e Kosovës.
Sipas tij, Greqia, pa shpjegime, ka votuar ndryshe në Këshillin e Evropës (KE), nga vendet e tjera që janë kundër pavarësisë së Kosovës.
Kartugalos thotë se ky vendim i autoriteteve greke është i keq dhe nuk kontribuon në atë që duhet të jetë politika shtetërore e atij vendi.
“Vendi ynë duhet të promovojë gjithmonë paqen dhe stabilitetin në Ballkan, duke mbështetur hapa dhe zgjidhje të pranueshme reciprokisht. Vendimi i qeverisë për të votuar për pranimin e Kosovës në Këshillin e Evropës (KE), për t’u dalluar nga vendet e tjera të Bashkimit Evropian që nuk e njohin Kosovën, si Spanja, Rumania dhe veçanërisht Qiproja, që votuan kundër, nuk i kontribuon këtij qëllimi. Ky qëndrim nuk është diskutuar me forcat politike në vendin tonë, ndonëse ndryshon pa shpjegim qëndrimin e prerë të Greqisë për statusin e Kosovës. Në të njëjtën kohë, kjo dobëson rolin e ndërmjetësit që duhet të ketë Greqia në rajon” – ka theksuar Kartugalos.
Efektet e pranimit të aplikacionit të Kosovës në KE, duket se i kanë luhatur qëndrimet e deridjeshme të aleatëve të Serbisë, megjithatë, kjo mbetet të shihet nëse ndonjë prej aleatëve të vjetër, do të ndryshojë përfundimisht qëndrim. /FolDrejt/
