Ambasadori i Republikës së Turqisë në Kosovë, Sabri Tunç Angili, i ka çmuar lart raportet ndërmjet Kosovës dhe Turqisë. Sipas tij, ato kanë ardhur vetëm duke u forcuar, shkruan Fol Drejt.
Në një intervistë për Telegrafin, Angili ka thënë ndër të tjera se edhe investimet turke në Kosovë, kanë shënuar rritje kohëve të fundit.
Angili, që në krye të intervistës, nuk e ka shmangur çështjen e organizatës terroriste FETO. Sipas tij, FETO në Kosovë nuk është vetëm kërcënim për Turqinë, por edhe për Kosovën. Ai ka thënë se kjo organizatë terroriste përdor shkolla, kompani apo xhami për të fshehur agjendën e tyre të paligjshme.
“Ata i përdorin këto institucione për të rekrutuar njerëz, për të financuar aktivitetet e tyre terroriste nga pastrimi i parave, mashtrimi apo evazioni fiskal. Prandaj, ne i propozuam një mekanizëm efektiv Kosovës për të luftuar kundër FETO-s dhe organizatave të tjera terroriste si dhe krimit të organizuar. Ne presim përgjigjen e tyre” – citohet të ketë thënë ambasadori Angili.
Sa i përket bashkëpunimit në fushën e ekonomisë, ambasadori turk ka theksuar se investimi i Turqisë në Kosovë është rreth 10% e të gjitha investimeve tona në Ballkan:
“Turqia ishte partneri numër një tregtar i Kosovës vitin e kaluar. Kompanitë turke punësuan drejtpërdrejt 10 mijë persona në Kosovë. Tani duhet të kalojmë në një fazë tjetër të bashkëpunimit tonë ekonomik. Ndryshimet në zinxhirët e furnizimit pas COVID-it, rëndësia e sigurisë së ushqimit dhe energjisë pas luftës në Ukrainë kërkojnë një model të ri partneriteti ekonomik midis vendeve tona. Për këtë qëllim, ne i propozuam Kosovës një mekanizëm të quajtur JETCO (Mekanizmi i Përbashkët i Bashkëpunimit Ekonomik dhe Tregtar).”
Sipas ambasadorit Angili energjia, infrastruktura, tekstili, siguria ushqimore dhe zhvillimi rural janë disa fusha joshëse për investitorët turq. Ai ka thënë se i është propozuar Qeverisë së Kosovës të krijohen grupe punuese specifike sektoriale, për t’i shqyrtuar projektet e mundshme në këto fusha, sepse, sipas tij, Kosova ka potencial të madh në kuptimin e investimit dhe joshjes së investitorëve./FolDrejt/
