Ambasadori amerikan në Beograd, Christopher Hill është shprehur i shqetësuar dhe i zhgënjyer që Kosova ka refuzuar kërkesën për shtyrjen e afatit të konvertimit të targave në ato RSK për pjesën veriore të Kosovës.
“Qeveria e Shteteve të Bashkuara të Amerikës, së bashku me partnerët e saj ndërkombëtarë, ka kërkuar vazhdimisht nga Qeveria e Kosovës që të vazhdojë periudhën e zbatimit të riregjistrimit të automjeteve. Jemi të zhgënjyer dhe të shqetësuar për refuzimin e Qeverisë së Kosovës për të pranuar kërkesat dhe këshillat e partnerëve të saj më të afërt ndërkombëtarë për këtë çështje”, është shprehur ambasadori Hill për gazetën serbe “Blic”.
“Ne i bëjmë thirrje Kosovës dhe Serbisë që të vazhdojnë të marrin pjesë në dialogun e ndërmjetësuar nga BE-ja”, ka shtuar ai./FolDrejt/