Ambasadori i Rusisë në Beograd Aleksandar Bochan Khachenko ka bërë një deklaratë të çuditshme në lidhje me çështjen e Kosovës, raportojnë mediat serbe, shkruan Fol Drejt.
Sipas opozitares Danas, Khachenko ka deklaruar se statusi përfundimtar i Kosovës duhet të përcaktohet “në kushte të tjera gjeopolitike, pas përfundimit të luftës në Ukrainë, luftë të cilën Rusia me siguri do ta fitojë!”.
Në një intervistë për agjencinë Beta ai e ka komentuar edhe planin franko-gjerman, të cilin nuk e ka vlerësuar, duke thënë se një propozim i tillë nuk është i pranueshëm për Serbinë, meqë ai ia ndalon kësaj të fundit që ta pengojë anëtarësimin e Kosovës në organizatat ndërkombëtare.
“Ndryshe nga Rezoluta 1244 e Këshillit të Sigurimit të OKB-së, plani franko-gjerman nuk është bazë për zgjidhje afatgjatë të çështjes së Kosovës. Dhe ky plan, si gjithë të mëparshmet, parasheh lëshime të njëanshme nga Beogradi, në radhë të parë që Kosova të bëhet anëtare e të gjitha institucioneve ndërkombëtare dhe Kombeve të Bashkuara. Plani franko-gjerman në thelb përfaqëson njohjen ndërkombëtare të pavarësisë së Kosovës. Perëndimi këmbëngul hapur se Beogradi duhet të njohë pavarësinë e Kosovës,” citohet të ketë thënë Bocan-Kharchenko.
Për disa nga njohësit e zhvillimeve atje, deklarata e Harchenkos është një nxitje për ta shtyrë estabilishmentin aktual të mos i shkëputë raportet me Rusinë. Duke e refuzuar planin, Serbia edhe më tej do të mbetej e ndikuar nga gjeopolitika ruse, e cila nuk ia garanton një të ardhme të ndritur.
E vërteta është se plani franko-gjerman është pranuar në parim nga të dyja palët, ndërsa Kryeministri Albin Kurti e ka cilësuar si “bazë e mirë” për vazhdimin e procesit të dialogut. Por procesi është duke kaluar nëpër një krizë të re, pas insistimit të Vuçiqit për ta implementuar Asociacionin e Komunave me Shumicë Serbe, marrëveshje kjo që derivon nga viti 2013 dhe 2015, e cila po konsiderohet e dëmshme nga pala e Kosovës, sidomos pa e pasur në qendër njohjen reciproke./FolDrejt/
