Sipas CNN një anije luftarake e marinës amerikane lundroi përmes ngushticës së Tajvanit të martën, për çka ndikoi në tensionimin e mëtejmë të raporteve Uashington – Pekin, transmeton Fol Drejt.
Sipas palës amerikane, USS Benfold demonstroi “angazhimin e tij për një Indo-Paqësor të lirë dhe të hapur.”Por Pekini e cilësoi atë si një “provokim” që tregonte se Shtetet e Bashkuara të Amerikës (ShBA), s’janë veçse “shkatërruese të paqes dhe stabilitetit.”
Ngushtica është një shtrirje ujore 180 kilometra e gjerë që ndan ishullin e vetëqeverisur demokratik të Tajvanit nga Kina kontinentale. Ndërsa pala amerikane pretendon se ujërat në të cilat ka lundruar anija luftarake, janë territor ndërkombëtar, Kina, në anën tjetër, pretendon se ato ujëra, bashkë me Tajvanin, i përkasin asaj vetë.
“Të mërkurën kaloi tranzicioni në Benfold përmes një korridori në ngushticën që është përtej detit territorial të çdo shteti bregdetar”, tha zëdhënësi i Flotës së 7-të të SHBA-së, Lt. Nicholas Lingo.
Por Kol Shi Yi, zëdhënës për Komandën e Teatrit Lindor të Ushtrisë Çlirimtare Popullore, iu përgjigj kësaj deklarate duke thënë se:
“Trupat tona mbajnë gatishmëri të lartë në çdo kohë dhe do të mbrojnë me vendosmëri sovranitetin kombëtar dhe integritetin territorial.”
Historia e tensioneve ndërmjet ShBA-ve dhe Kinës, për sa i përket Tajvanit, nuk është e re. Amerikanët e kanë mbështetur hapur disponimin e autoritetit zyrtar tajvanez për pavarësi, ndërsa kinezët kanë trumpetuar se shumë shpejt mund ta rikthejnë “këtë pjesë të humbur”, nën sovranitetin e tyre./FolDrejt/
