Pikat kufitare me Serbinë, po vijojnë të mbesin të mbyllura. Këtë e ka bërë të ditur Qendra Kombëtare e Menaxhimit Kufitar në kuadër të Ministrisë së Punëve të Brendshme, shkruan Fol Drejt.
Pikat kufitare në Jarinjë, Merdar dhe Bërnjak, janë mbyllur për mallrat serbe, menjëherë pas rrëmbimit të policëve kosovarë nga forcat speciale policore e ushtarake serbe.
Ministria e Punëve të Jashtme (MPJ), ndërkaq, ka njoftuar se në territorin e Serbisë, në afërsi të pikave kufitare në Jarinjë dhe në Merdare, për shkak të protestave që po mbahen, nuk është i mundur kalimi i autobusëve dhe kamionëve që vijnë nga Kosova.
“Nëse keni hyrë tashmë në Serbi, atëherë ju lutemi t’i përdorni pikat kufitare ne Mutivodë, Dheu i Bardhë ose të merrni rrugë përmes Maqedonisë së Veriut (pikë-kalimi kufitar i Preshevës) përmes Shkupit. Nëse nuk keni hyrë tashmë në Serbi, ju lutemi, mos udhëtoni përmes Serbisë”, thuhet në njoftimin zyrtar.
Bëhet e ditur se protestuesit kanë bllokuar gjithashtu pikën kufitare në Bërnjak. Nuk është i sigurt për momentin as kalimi i veturave./FolDrejt/
