Argjentina e ka fituar sfidën kundër Meksikës me rezultat 2-0, në takimin e dytë në kuadër të Grupit C në Kampionatin Botëror “Katari 2022”,shkruan Fol Drejt.
Në prani të 89 mijë e 966 spektatorëve në “Lusail Stadium” Argjentina pas një paraqitje të shkëlqyer ka siguruar tri pikë përballë Meksikës. Pjesa e parë u mbyll pa gola pavarësisht që argjentinasët ishin më insistues për të realizuar gol.
Në pjesën e dytë, Kampionët e Amerikës Latine zhvilluan një lojë më dominuese duke arritur të realizojnë dy golat e fitores. Fillimisht në minutën e 64-të ishte Lionel Messi që me një gol spektakolar nga largësia realizoi për Argjentinën. Në minutën e 87-të pas një asistimi nga Lionel Messi ishte Enzo Fernandez që realizoi golin e dytë për rezultatin përfundimtar Argjentina – Meksika 2-0.
Në takimin tjetër të Grupit C, Polonia e ka mundur Arabinë Saudite me rezultat 2-0 me golat e Piotr Zielinski dhe Robert Lewandowskit.
Më 30 nëntor nga ora 20:00 zhvillohen takimet e rrethit të tretë. Polonia përballet me Argjentinën, ndërsa Meksika luan kundër Arabisë Saudite. /Gzim Olluri FolDrejt/
