Drejtori i lajmeve të televizionit Nova S TV Slobodan Georgiev, i kritikuar ashpër nga pozita serbe kohëve të fundit, ka vlerësuar për N1 se presidenti serb Aleksandër Vuçiq, kur bëhet fjalë për negociatat me Kosovën, e ka reduktuar hapësirën për manovrim sepse e zvarriti për 10 vjet, “dhe ai na solli të gjithëve në një situatë: merreni ose lëreni!”. Ai shton se politika e tij ka të bëjë me blerjen e kohës dhe tani ajo kohë ka mbaruar, transmeton Fol Drejt.
“Vuçiq na tha se nëse nuk e pranojmë propozimin evropian (për normalizimin e marrëdhënieve ndërmjet Beogradit dhe Prishtinës) do të vuajmë. Nuk besoj se do të lëndoheshim, por ai po”, beson Georgiev.
Ai rikujton se plani i zbatimit parashihet që si proces të përfundojë në 150 ditët e ardhshme, por kjo nuk do të thotë se do të ndodhë.
“Është një proces që ka vazhduar që nga vera e kaluar dhe duhet të përfundojë në fund të kësaj vere”, tha ai.
Në një emision të mëngjesit në N1Info ai shtoi se ata që udhëheqin procesin, kryesisht i dërguari i BE-së për dialogun ndërmjet Beogradit dhe Prishtinës Miroslav Lajçak dhe i dërguari special i SHBA-së për Ballkanin Perëndimor Gabriel Escobar, i besojnë Vuçiqit.
Ai gjithashtu beson se Vuçiq nuk duhet ta zbatojë planin evropian, por se kjo do të nënkuptonte që ai më pas do të izolohej.
“Vuçiq tani po e peshon çështjen, nëse do t’i leverdiste t’i hynte në një aventure të tillë”, vlerëson ai dhe shton se “nuk mund të dimë se çfarë ka në kokën e Vuçiqit, përveç se ai dëshiron të qëndrojë sa më gjatë në pushtet”.
Sa i përket raundit të ardhshëm të dialogut më 18 mars në Ohër, në të cilin të dyja palët duhet të bien dakord për planin e zbatimit, ai thotë se kryeministri i Kosovës Albin Kurti, me deklaratat e tij po e inkurajon Vuçiqin, duke e shtyrë atë të braktisë planin.
“Besoj se Vuçiq do të jetë bashkëpunues dhe pastaj do të jetë i pari që do të dalë para gazetarëve dhe do të thotë se nuk ka qenë dakord për asgjë”, thotë ai./FolDrejt/
