Punonjësi i policisë Nevaldo Hajdaraj i cili akuzohet nga autoritetet se gjatë shërbimit në Tiranë ka qëlluar me armën e shërbimit një 25-vjeçar, do të qëndrojë në paraburgim në periudhën e hetimeve, ndërkohë ky vendim mund të apelohet.
Gjykata në seancën e sotme e cilësoi të ligjshëm ndalimin e punonjësit të policisë, i cili u arrestua pas ngjarjes më 8 dhjetor për veprën penale “Vrasje e kryer në kapërcim të kufijve të mbrojtjes së nevojshme”.
Në lidhje me ngjarjen ku mbeti i vdekur i riu, dha dorëheqje ministri i Brendshëm i Shqipërisë, Sandër Lleshaj dhe për dy ditë me radhë pas ngjarjes në Shqipëri u organizuan protesta nga qytetarë dhe aktivistë, protesta që janë shoqëruar edhe me akte dhune dhe dëme materiale.
Drejtoria e Përgjithshme e Policisë së Shqipërisë njoftoi se për protestën e datës 10 dhjetor në Tiranë janë arrestuar në flagrancë 59 persona dhe janë proceduar penalisht në gjendje të lirë 116 shtetas të tjerë, të akuzuar për manifestim të paligjshëm, plagosjen e punonjësve të policisë, kundërshtimin i punonjësve të policisë, si dhe shkatërrimin e pronës publike e private.
