Dy persona janë arrestuar në veri të Mitrovicës, nën dyshimin për kryerjen e disa veprave penale si: “Blerja, posedimi, shitja dhe shpërndarja e paautorizuar e narkotikëve substancave psikotrope ose analoge”, “Mbajtje në pronësi posedimi i pa autorizuar i armës” dhe “Falsifikim i dokumentit”.
“Policia e Kosovës, njësia e Drejtorisë për Hetimin e Trafikimit me Narkotikë në Mitrovicë Veri, pas pranimit të një informacioni në lidhje me dyshimet për substancë narkotike dhe armë në një fshat të komunës së Zveçanit, ka ndërmarr veprimet e nevojshme policore ku ka ndaluar veturën e dyshuar me vozitës (J. A.), në të cilën gjatë kontrollit nën ulësen e vozitësit janë gjetur një sasi e dyshuar narkotike e llojit kokainë me peshë 453 gramë”, thuhet në njoftimin e policisë.
Sipas policisë, është kryer edhe kontrollimi i shtëpisë së të dyshuarit (J. A.), ku gjatë kontrollit në dhomën e të birit të tij (M. A.), si dhe në shtëpi, janë sekuestruar dëshmitë si në vijim: Pistoletë Berata,një karikator, katër fishekë të kalibrit 7.62 mm, sasi e dyshuar e marihuanes me peshë 2.71 gramë, qese të vogla të zbrazëta që shërbejnë për paketimin e substancave narkotike, një SIM kartel, dokument zyrtar i cili dyshohet se është i falsifikuar, dokument i sindikatës se policisë së Serbisë me fotografi të dyshuarit M. A., disa fleta që dyshohet se ka shënime që lidhen me shitjen e substancave narkotike, veturë Opel Zafira, si dhe substancë e dyshuar narkotike për kokainë, me peshë 453 gramë.
Në lidhje me rastin është njoftuar prokurori i shtetit i cili ka udhëzuar që personave të dyshuar pas intervistimit të ju caktohet masa e ndalimit prej 48 orësh.
