Policia e Kosovës në bashkëpunim me Prokurorinë Themelore Gjilan, kanë kryer veprime hetimore për disa muaj dhe kanë arritur të sigurojnë dëshmi se i dyshuari me iniciale (A.K.) me rastin e ofertimit në tenderin ’’Furnizim me material për zyre’’ në Komunën e Gjilanit, kishte falsifikuar dhe dorëzuar referencën të lëshuar më herët në vitin 2021.
Sipas policisë, me këto referenca ai kishte implikuar Ministrinë e Forcës së Sigurisë kinse kishte lëshuar këtë referencë për kompaninë e tij, transmeton Fol Drejt.
“Me këto referenca i dyshuari kishte aplikuar në Komunën e Gjilanit në tenderin e lartshënuar duke fituar dhe firmosur kontratën me komunën e Gjilanit në vlerën njëqind e pesëdhjetë e pesë mijë euro (155,000€).
Me këto veprime i dyshuari, dyshohet se ka konsumuar veprat penale “Keqpërdorimi dhe mashtrimi në Prokurimin publik” dhe “Falsifikim i dokumenteve”.
Andaj, sot më datë 13.03.2023, i dyshuari i lartcekur me iniciale është intervistuar në prezencë të avokatit të tij dhe pas intervistimit ndaj të dyshuarit nga Prokurori i shtetit është lëshuar Aktvendim për ndalim dhe i njëjti është dërguar në mbajtje për 48 orë.”, thuhet në njoftimin e policisë./FolDrejt/
