Një ditë pas sulmit terrorist në Kosovë, Kisha Ortodokse Kombëtare Shqiptare, me bekimin e kreut të saj Nikolla Xhufka, ka vendosur ta “mallkojë kishën serbe dhe kreun e saj, Patriarkun Profire”, shkruan Fol Drejt.
Duket që ky vendim ka nxitur reagime të ashpra në serbi, ndërsa At Xhufka, është cilësuar si një prift i rremë.
Objektet e kultit ortodoks serb në Kosovë, edhe në opinionin ndërkombëtar, kanë filluar të shihen me dyshim, qyshkur deputetja britanike Alicia Kearns akuzoi Kishën Ortodokse Serbe se po iu ndihmon grupeve kriminale për t’i strehuar armët e kontrabanduara nga Serbia.
Të dielën e 24 shtatorit kur një grup i armatosur serbësh sulmuan Policinë e Kosovës, ngjarja u cilësua gjerësisht si sulm terrorist, u ndërlidh sërish me një objekt të tillë të kultit ortodoks. Grupi i armatosur, pasi ishte rrethuar nga njësitë speciale të Policisë së Kosovës, u strehua në Manastirin e Banjskës.
Një ditë më vonë, Kisha Ortodokse Kombëtare Shqiptare, mori disa vendime, që duket se nuk i kanë pëlqyer aspak opinionit serb, e aq më pak Kishës Ortodokse Serbe.
Më saktësisht At Xhufka mori këto vendime kishtare:
1- Kisha jonë mallkon kishen serbe dhe kreun e saj, Patriarkun Profire.
2- Ndarja kanunore me çdo kishë serbe në Serbi ose në mbarë botën.
3- Shpalljen heretik të çdo kleriku serb.
4- Mosnjohjen e kishës serbe si kishë paqësore të krishterë.
5- Mosnjohjen e asnjë dokumenti që lëshohet nga kisha serbe (certifikata pagëzimi, kurorëzimi etj.)
6- Ndalimin e hyrjes se çdo prifti serb në kishën shqiptare.
Ky vendim hyn në fuqi menjëherë.
Sipas mediumit ultranacionalist serb Kossev, At Xhufkën nuk e njeh asnjë kishë ortodokse. Sipas artikullit në fjalë, Xhufka “bënë deklarata patriotike” ndërsa tallet me komunitetet e tjera fetare.
Ditë më parë Xhufka ka shkuar te një kishë ortodokse në Prizren, ndërsa i ka bërë thirrje KFOR-it dhe Kryeministrit Albin Kurti, që t’i bastisë kishat dhe manastiret ortodoks serbë, sepse, sipas tij, aty pa mëdyshje do të gjinden armë.
“Kisha serbe është terroriste” – ka thënë ai ndër të tjera, duke kërkuar nga Kryeministri Kurti që priftërinjtë serbë t’i shpallë persona non-grata./FolDrejt/
