Një surprizë e madhe ka ndodhur mbrëmë pasi futbollistët e Cremonese në fazën e 16-të të Kupës së Italisë mposhtën Napolin në fushë si mysafir pas goditjeve të penalltive me rezultat 7:6; (2:2, 2:2).
Ishte një duel midis skuadrës më të mirë (Napoli) dhe më të dobët (Cremonese) në Serie A për momentin, dhe Cremonese ende nuk ka mundur askënd në kampionat këtë sezon. Megjithatë, në Kupë ata arritën rezultatin më të lartë të sezonit deri më tani dhe e përjashtuan skuadrën që ka 40 pikë më shumë se ata në Serinë A (47-7).
Mysafirët nga Kremona kaluan në avantazh në minutën e 18-të dhe shënues ishte Pickel. Megjithatë, Napoli arriti të kthejë rezultatin në fund të pjesës së parë. Fillimisht barazoi braziliani Juan Jesus në minutën e 33-të, ndërsa argjentinasi Simeone kaloi në epërsi Napolin në minutën e 36-të.
Në pjesën e mbetur të ndeshjes, Napoli u qetësua dhe kontrolloi ngjarjet në fushë deri në minutën e 87-të. Por më pas Afena-Gyan shënoi me kokë për të bërë rezultatin 2:2 dhe ndeshja shkoi në kohë shtesë.
Nga minuta e 100-të Napoli kishte më shumë lojtarë pasi u përjashtua lojtari mysafir Sernicola, dhe përkundër rasteve të shumta, Napoli nuk shënoi deri në fund golin e tretë, me të cilin do të kishte shmangur penalltitë. Mysafirët ishin më të suksesshëm në gjuajtjet nga pika e bardhë, kurse nga Napoli vetëm Lobotka nuk e tundi rrjetën, prandaj vendasit humbën në këtë ndeshje. Në çerekfinale, Cremonese do të presë Romën në shtëpi.
Pas derbit ndaj Juventusit pak ditë më parë, Napoli pushoi shumë lojtarë të tij. Kvarackelia nuk ishte as në skuadër, ndërsa Zambo Anguissa, Zielinski dhe Politano hynë në lojë në pjesën e fundit të ndeshjes, transmeton Fol Drejt.
