Kryeministri i Republikës së Kosovës – Albin Kurti, është përplasur në distancë me krerët e Serbisë, për çështjen e energjisë elektrike në veriun e Kosovës, shkruan Fol Drejt.
Disa postime të Kryeministrit Kurti në llogarinë e tij në Twitter, duket se kanë ngjallur zemërimin e Kryeministres Ana Brnabiq e cila i ka cilësuar deklaratat e tij si “shpifje”!
“Sigurisht që për këto padrejtësi nuk kanë faj qytetarët tanë në komunat veriore. Ata e kuptojnë dhe pranojnë se pagesa për shërbimet bazë si energjia elektrike dhe uji është normale dhe se kjo do të mundësonte investimet e nevojshme për të përmirësuar më tej cilësinë e shërbimeve” – shkroi ndër të tjera Kryeministri Kurti, duke ua bërë me dije autoriteteve serbe se marrëveshja për energji, nuk është zbatuar asnjëherë, për faj të Serbisë.
“Strukturat paralele të kontrolluara nga Serbia në komunat veriore të Kosovës u kanë kushtuar qytetarëve dhe taksapaguesve në pjesën tjetër të vendit 320 milionë euro në faturat e papaguara të energjisë dhe 17 milionë euro në faturat e furnizimit me ujë që nga viti 1999.”
Serbia-controlled parallel structures in Kosova's northern municipalities have cost citizens and taxpayers in the rest of the country 320M euros in unpaid energy bills and 17M euros in water supply bills since 1999.
— Albin Kurti (@albinkurti) February 12, 2023
Ndërsa, sikur të donte ta ilustronte me një shembull konkret se si abuzimi me energji dhe resurse të tjera të Kosovës nga strukturat paralele ka sjell vetëm forcimin e krimit të organizuar, Kurti veçoi rezultatet e një aksioni të policisë në veri, ku për rrjedhojë u shkatërruan 3 laboratorë ilegalë:
“Policia e Kosovës ka shkatërruar dje 3 laboratorë ilegale të drogës në veri të Kosovës, një fitore e qartë për sundimin e ligjit. Bandat kriminale të sponsorizuara nga Serbia nuk do të ndalen para asgjëje – duke përfshirë barrikadat e armatosura dhe sulmet e dhunshme ndaj policisë – për të mbrojtur ndërmarrjet e tyre të paligjshme. Ata do të dështojnë.”
Kjo duket se e ka xhindosur Kryeministren Brnabiq e cila tha se ky është vetëm një shembull më shumë i “shkallës dhe paturpësisë së gënjeshtrave të Aljbin Kurtit”.
This is just one example of the extent and audacity of lies of Albin Kurti. Can one imagine to what extent he lies about things which are less easy to check, and less obvious (also less known) than this? Brutal. https://t.co/E6i1LFKFvS
— Ana Brnabic (@anabrnabic) February 13, 2023
Ajo ka reaguar ndaj një mesazhi të publikuar më parë në Twitter të të ashtuquajturit drejtor i Zyrës së Qeverisë për Kosovën, Petar Petkoviq, i cili ka shkruar se “Për dy dekada Beogradi ka mbështetur financiarisht konsumin e energjisë elektrike në veri të Kosovës dhe, për shembull, nga Nëntor 2009 deri në dhjetor 2020 për këtë qëllim kemi ndarë 171 milionë euro”.
Mirëpo zyrtarët e Kosovës e dëshmojnë të kundërtën. Për Ministren e Ekonomisë Artane Rizvanolli, këtu duhet të kërkohet arsyeja pse qytetarët serbë në veri, nuk paguajnë rrymë:
“Kjo është arsyeja pse faturimi dhe pagesa e energjisë elektrike në komunat veriore kundërshtohet, jo nga qytetarët tanë atje, por nga bandat kriminale, biznesi i paligjshëm i të cilave po lulëzon me këtë energji elektrike të vjedhur dhe që janë (të lidhura me) strukturat e kontrolluara nga Serbia dhe trajtohen si heronj në Serbi”, ka thënë Rizvanolli.
Sipas një hulumtimi të grupit medial Vice World News, veriu i Mitrovicës ka qenë, veç tjerash, edhe strehë e bizneseve të tjera ilegale, sidomos atyre që ndërlidhen me kriptovalutat.
Përpjekja e Qeverisë së Kosovës për ta shtrirë autoritetin edhe në këtë pjesë të Kosovës, ndërsa me instrumente ligjore provon ta luftojë krimin e organizuar, është tërësisht legjitime – thonë njohësit e zhvillimeve në vend./FolDrejt/
