Autoritetet iraniane njoftuan sot se kanë çmontuar një rrjet “terrorist” të lidhur me agjencinë e inteligjencës izraelite, Mossad, e cila po planifikonte sulme në “lokacione të ndjeshme” në Iran, njoftoi sot agjencia zyrtare iraniane e lajmeve Irna.
“Anëtarët e një rrjeti terrorist spiunazhi të lidhur me Mossad-in u arrestuan,” raportoi Irna, duke cituar një deklaratë nga Ministria e Inteligjencës e Iranit që nuk dha detaje mbi numrin e të arrestuarve apo kombësinë e tyre. Megjithatë, thuhet se të dyshuarit “hynë në Iran përmes Kurdistanit”, në Irakun verior, shkruan protothema, transmeton Fol Drejt.
“Ata synonin të kryenin akte sabotazhi dhe akte të paprecedentë terroriste në zona të ndjeshme dhe objektiva të paracaktuara, duke përdorur pajisje operacionale efektive dhe eksplozivët më të fuqishëm”, shtohet në deklaratë, pa dhënë më shumë informacion për objektivat në fjalë.
“Armët, eksplozivët dhe pajisjet e tyre gjithashtu u konfiskuan të gjitha,” sipas Irna. Irani ka shpallur vazhdimisht arrestimin e agjentëve që punonin për shërbimet e inteligjencës të vendeve të huaja, veçanërisht armikun e tij kryesor, Izraelin. Republika Islamike ka akuzuar gjithashtu shtetin hebre për sabotimin e disa prej objekteve të tij bërthamore dhe vrasjen e shkencëtarëve iranianë.
Dhe në korrik 2021, autoritetet thanë se arrestuan “agjentë” të cilët ishin pjesë e një “rrjeti” që punonte për Izraelin dhe sekuestruan një arkë armësh të destinuara për t’u përdorur për “trazira” ndërsa jugperëndimi i vendit tronditet nga protestat për ndërprerjet e ujit./FolDrejt/
