Avioni luftarak turk pa pilot Bayraktar Kızılelma ka përfunduar fluturimin e tretë testues si dhe testin e identifikimit të sistemit të lartësisë së mesme dhe kompania turke Baykar theksoi se janë shumë të kënaqur me rezultatet, raporton Klix, përcjell Fol Drejt.
Drejtori i kompanisë Selcuk Bayraktar publikoi një video të testit të ri.
“Aeroplani luftarak Bayraktar ka përfunduar me sukses testin e identifikimit të sistemit të lartësisë së mesme. Avioni luftarak pa pilot ka arritur një lartësi prej 20,000 këmbësh. Testet në aeroplan do të vazhdojnë dhe ne planifikojmë të fillojmë prodhimin masiv në fillim të vitit 2024”, tha Bayraktar.
Gjithashtu, drejtori i kompanisë theksoi se Baykar po përgatitet edhe për fluturimin e parë të avionit pa pilot TB3, i cili do të jetë avioni i parë i këtij lloji që do të mund të ngrihet dhe ulet në aeroplanmbajtëse me pista të shkurtra.
“Droni dhe avioni do të prezantohen në një event të madh teknologjik në Stamboll, i cili do të mbahet nga 27 prilli deri më 1 maj”, shkruajnë mediat turke.
Sistemi kombëtar i avionëve luftarakë pa pilot (MIUS), i quajtur Kizilelma (Molla e Kuqe), me reflektim të ulët të radarit dhe shpejtësi nënsonike, është gjithashtu një projekt i rëndësishëm strategjik pasi pritet të sigurojë vetëmjaftueshmërinë e forcave ajrore të Turqisë.
Rëndësia e këtij projekti u theksua veçanërisht pasi Turqia u përjashtua nga projekti F-35, i cili duhej të ngrihej nga aeroplanmbajtësja që po ndërton në bashkëpunim me Spanjën.
Avioni i shpejtë luftarak pa pilot Kizilelma përfaqëson një zgjerim të konsiderueshëm të aftësive. /FolDrejt/
