Ylli uellsian Gareth Bale përmes një letre lamtumire drejt tifozëve e ka konfirmuar se do të largohet këtë verë nga gjiganti spanjoll Real Madrid.
Bale arriti te Real Madridi në shtatorin e vitit 2013 nga skuadra angleze Tottenham Hotspur, ku që nga ajo kohë ka arritur të fitojë trofe të shumtë, ndër ta edhe pesë Liga të Kampionëve.
Vazhdimisht kishin qarkulluar spekulime të shumta se Bale do të largohet këtë verë nga “Galaktikët”, dhe këtë gjë tani e ka konfirmuar vetë ylli uellsian.
Në një letër dedikuar tifozëve, Bale tregon se eksperienca me Realin ishte një eksperiencë të cilën ai nuk do ta harroj kurrë.
Ndërkaq, letrën e Bale e gjeni më poshtë.
“E shkruaj këtë mesazh që t’i falënderoj të gjithë shokët e mi të skuadrës, trajnerët e mi, stafin dhe tifozët që më kanë përkrahur mua.
Erdha këtu para 9 vitesh si një tinejxher i cili dëshironte që ta realizonte ëndrrën e tij për të luajtur për Real Madridin. Të vesh fanellën e famshme të bardhë, të vesh emblemën e klubit në gjoksin tim, të luaj në ‘Santiago Bernabeu’, të fitoj trofe dhe të jem pjesë e asaj që është më e famshmja, të fitoj Ligën e Kampionëve.
Tani mund të shikoj pas, të reflektojë dhe të them me sinqeritet që kjo ëndërr është bërë realitet dhe shumë më shumë.
Të jem pjesë e historisë e klubit dhe të arrijë sukseset që i kemi arritur sa isha lojtar i Real Madridit ka qenë një eksperiencë e shkëlqyer dhe një të cilën nuk do ta harroj kurrë.
Gjithashtu dua të falënderoj presidentin Florentino Perez, Jose Angel Sanchez, dhe bordin që ma dhanë mundësinë të luaj për këtë klub. Së bashku ne kishim mundësinë që të krijojmë disa momente që do të jenë përgjithmonë pjesë e këtij klubi dhe futbollit.
Ishte një nder, faleminderit!
HALA MADRID!”, shkruante në letrën e Bale.
Që prej transferimit nga Tottenhami te Real Madridi, Gareth Bale ka arritur të bëjë 256 paraqitje për gjigantin spanjoll, duke regjistruar 106 gola dhe 67 asistime mbi emrin e tij.
