Ngjashëm si në Shqipëri, që ka probleme në interpretimin historik mes Ballistëve dhe Partizanëve, edhe në vendet tjera të Ballkanit, veçanërisht në Bosnjë, Kroaci dhe Slloveni ka interpretime kontraverse mes Ustashëve dhe Partizanëve, informon foldrejt.com.
Kërkesa e një prifti kroat, Vinko Puljic, për të mbajtur një meshë përkujtimore për viktimat e vrara nga Partizanët në 1945, ka ngjallur reagime të shumta në Sarajevë, me pretekstin se ai mbron ekstremistët e djathtë ose ustashët, që realisht, edhe ata akuzohen për vrasjen e civilëve gjatë LDB. Përgjatë meshës së Puljic, mijëra boshnjakë protestuan në Sarajevë.
Poashtu, mesha në Sarajevë, keqpërdoret edhe nga përfaqësuesit e ekstremit të djathtë, për të treguar anën e shëmtuar të partizanëve dhe viktimizimin e kroatëve, pavarësisht se nga partizanët në fund të majit 1945 janë vrarë edhe shumë sllovenë, kroatë si dhe boshnjakë, serbë dhe malazezë. Të gjithë ata që mendoheshin të rrezikshëm për sistemin ose se kishin kolaboruar me nazistët.*
Konkretisht bëhet fjalë për rreth 60 mijë viktima, të cilët pasi u shpërngulën njëherë në Austri, ata u kthyen mbrapsht nga forcat britanike në Jugosllavi, ku edhe në kufirin jugosllavo-austriak, u vranë. Shumica e tyre ishin pjesëtarë të ustashëve, por dokumentat e fundit flasin edhe për shumë civilë.
Historitë shpesh kontraverse tregojnë mbi të gjitha sesa rëndë është të intepretohet ose studiohet historia e vërtetë në Europën juglindore, kjo sepse udhëheqësit keqpërdorin nacionalizmin për të ruajtur pushtetin. Një kardinal katolik kroat, tashmë i ndjerë, Franjo Kuharic, kështu do e formulonte sfidën në rajonin ballkanik: Pyetja më e vështirë nuk qëndron në atë, sesi të përkujtojmë viktimat e komunitetin tonë dhe sesi të shpallim fajtor komunitetin tjetër. Kroatët dhe serbët, katolikët, ortodoksët dhe muslimanët qëndrojnë përpara një pyetje më të vështirë morale: si mundet të përkujtojmë viktimat e një komuniteti tjetër dhe si do mundet të gjejmë fajtorin brenda komunitetit tonë?”
*Në fakt partizanët serbë do vrisnin edhe mijëra shqiptarë, por kjo nuk kishte të bënte me evenimentet e Bleiburgut 1945. Shqiptarët do vriteshin në Kosovë, Maqedoni Veriore, shpesh bile edhe në përkrahje të komunistëve shqiptarë në Shqipëri, ku si shembull kemi rastin e Masakrës së Tivarit. Por akuza ka edhe ndaj ballistëve që kanë vrarë partizanë shqiptarë, si në Rekën e Epërme.
