Banorët e Bërnicës së Epërme po vazhdojnë të përballen me mungesë të ujit tash e një kohë të gjatë. Në korrik të vitit të kaluar, ata patën mbajtur një protestë, por sot e asaj dite problemi nuk është zgjidhur.
Të kontaktuar nga Fol Drejt, banorët e kësaj lagje kanë thënë se përkundër premtimeve të institucioneve relevante, gjendja ka mbetur pandryshuar deri më tash.
“Edhe pas 9 muajve të protestës, Komuna e Prishtinës nuk ka ndërmarrë asgjë për zgjidhjen e këtij problemi” – ka thënë F. B për Fol Drejt.
Banorët kanë thënë se komuna e ka pranuar një kërkesë të parashtruar nga ta, për vendosjen e një pompe shtytëse, por ajo ka ngelur veç në letër.
Megjithatë, zyrtarët komunalë, kanë premtuar që kjo çështje do të zgjidhet shumë shpejt.
Habib Qorri, Shef i Sektorit të DSHPMSH-së, për Fol Drejt është shprehur optimist në këtë aspekt:
“Problemin me furnizimin me ujë të pijshëm në Bërnicë të Erpërme e kemi trajtuar dhe kemi pasur takime me banorët lokal ku kemi biseduar lidhur me zgjidhjen e këtij problem.
Edhe pse atje është i shtrirë rrjeti i ujësjellësit shtypja nuk është e mjaftueshme për t’i furnizuar të gjitha lagjet në Bërnicën e Epërme, këtë konfirmim e kemi marrë nga banorët por edhe KRU Prishtina.
Prandaj ne kemi organizuar takim edhe me Kryeshefin e KRU Prishtina për zgjidhjen teknike të këtij problemi, prandaj ne kemi planifikuar që me projektin e pompave shtytëse në rrjetin e ujësjellësit të bëjmë zgjidhjen duke rritur shtypjen dhe mandej banorët të kenë ujë në mënyrë të rregullt.”
Për më shumë, Qorri ka thënë se ky projekt është proceduar:
“Sipas planit buxhetor ne kemi proceduar këtë projekt, prandaj posa të kemi kontratë të nënshkruar në bashkëpunim me KRU Prishtinë do të realizojmë këtë projekt ku planifikohet të bëhet zgjidhja e furnizimit të rregullt me ujë të pijes.”/FolDrejt/
