Më herët, udhëheqësi separatist i të ashtuquajturës Republika Popullore e Luhanskut në Ukrainën lindore tha se një referendum mund të mbahet së shpejti për bashkimin me Rusinë, sipas agjencisë së lajmeve Reuters.
Në një reagim të fundit, Ministria e Jashtme e Ukrainës ka thënë se çdo referendum “fals” i mbajtur në pjesët e okupuara të Ukrainës do të jetë “i pavlefshëm”, raporton BBC.
Duke shkruar në Twitter, zëdhënësi i ministrisë së Jashtme, Oleg Nikolenko, tha se “asnjë vend në botë nuk do ta njohë kurrë ndryshimin me forcë të kufijve të njohur ndërkombëtarisht të Ukrainës.
“Rusia do të përballet me një përgjigje edhe më të fortë ndërkombëtare, duke thelluar më tej izolimin e saj”, shtoi ai.
Tre ditë përpara se të urdhëronte trupat në Ukrainë më 24 shkurt, presidenti rus Vladimir Putin njohu rajonet separatiste ukrainase të Luhansk dhe Donetsk si shtete të pavarura, megjithëse pjesa tjetër e botës i konsideron ato pjesë të Ukrainës.
