BE tha të shtunën se djegia e një kopje të Kuranit ose ndonjë libri tjetër të shenjtë “është ofenduese, mosrespektuese dhe një akt i qartë provokimi”, raporton AA, përcjell Fol Drejt.
Deklaratat erdhën pasi një person i identifikuar si Salwan Momika dogji një kopje të librit të shenjtë musliman nën mbrojtjen e policisë përpara një xhamie në Stokholm të mërkurën.
Përdhosja ishte caktuar të përkonte me Kurban Bajramin, një nga festat kryesore fetare islame të festuar nga muslimanët në mbarë botën.
“Manifestimet e racizmit, ksenofobisë dhe intolerancës së lidhur nuk kanë vend në Evropë,” tha në një deklaratë Nabila Massrali, zëdhënësja e BE-së për politikën e jashtme dhe sigurinë.
“BE i bashkohet Ministrisë suedeze të Punëve të Jashtme në refuzimin e saj të fuqishëm të djegies së një Kurani nga një individ në Suedi. Ky akt në asnjë mënyrë nuk pasqyron opinionet e Bashkimit Evropian.”
Ajo shtoi: “Është edhe më e trishtueshme që një akt i tillë është kryer në festën e rëndësishme muslimane të Kurban Bajramit”. /FolDrejt/
